Ազգային ժողովում առաջին ընթերցմամբ ներկայացվել է «Պրոբացիայի ծառայության մասին» օրենքում փոփոխություններ և լրացում կատարելու մասին օրինագիծը: Նախագիծը ներկայացրել է Արդարադատության նախարարի տեղակալ Տիգրան Դադունցը։ Iravaban.net-ը այս մասին տեղեկանում է Ազգային ժողովից։
Նախագծով առաջարկվում է՝
- ՀՀ պետական այլ մարմիններում կոչումով ծառայության ստաժը հաշվարկել Պրոբացիայի ծառայությունում հերթական կոչում շնորհելու համար ծառայության ստաժը հաշվարկելիս,
- Պրոբացիայի ծառայողներին՝ որպես խրախուսանք, հնարավորություն ընձեռել շնորհելու զբաղեցրած պաշտոնի համապատասխան կոչումից 1 աստիճանով ավելի բարձր կոչում, բացառությամբ՝ արդարադատության գնդապետի կոչումից բարձր կոչումների:
Ակնկալվում է, որ նախագծի ընդունման դեպքում այն կօգնի՝
- ներգրավել ավելի փորձառու և բանիմաց մասնագետներ,
- կանխել ծառայողների արտահոսքն այլ ծառայություններ, որտեղ կոչումով ծառայության ստաժը հաշվարկվում է։
Նախագծի վերաբերյալ ԱԺ պետական-իրավական հարցերի մշտական հանձնաժողովի դրական եզրակացությունը ներկայացրել է Ալխաս Ղազարյանը։
