Արմատական «Թալիբան» շարժումն ավելի քան 130,000 մարդ է հավաքագրել իր կանոնավոր բանակում՝ 2021 թվականի ամռանը Աֆղանստանում իշխանությունը գրավելուց հետո: Այս մասին հայտնել է թալիբների կառավարությունում պաշտպանության նախարարության ներկայացուցիչ Էնայաթուլլահ Խավարեզմին, փոխանցում է «ՏԱՍՍ» լրատվական գործակալությունը։
«Ավելի քան 130,000 մարդ հավաքագրվել է կանոնավոր բանակում և այս գործընթացը կշարունակվի: Հավաքագրումն ավարտվելուց հետո աֆղանները կտեսնեն անկախ, լավ պատրաստված և նվիրված զինվորական անձնակազմ, որը կապահովի անվտանգությունը և կպաշտպանի աֆղանական հողերն ու սահմանները», – ասել է Խավարիզմին:
Ապրիլի 27-ին թալիբների կողմից պաշտպանության նախարարի պաշտոնում նշանակված Մոհամմադ Յակուբը հայտնել է, որ Աֆղանստանի նոր կանոնավոր բանակն ունի առնվազն 110 հազար մարդ։
Փետրվարի կեսերին Խավարեզմին խոսել է նոր բանակի թվաքանակը մինչև 150000-ի հասցնելու իր մտադրության մասին՝ նշելով, որ թալիբները նախատեսում են մոբիլիզացնել մարտական փորձ ունեցող զինվորականներին, այդ թվում՝ նախկին ռեժիմի տակ ծառայածներին:
Հիշեցնենք, որ թալիբները լայնածավալ գործողություն են սկսել Աֆղանստանում վերահսկողություն հաստատելու համար այն բանից հետո, երբ ԱՄՆ-ն հայտարարեց երկրից իր զինված ուժերը դուրս բերելու որոշման մասին։
2021 թվականի օգոստոսի 15-ին թալիբները առանց կռվի մտան Քաբուլ, իսկ նախագահ Աշրաֆ Ղանին լքեց հանրապետությունը։
Սեպտեմբերի 6-ին թալիբները հայտարարեցին ամբողջ Աֆղանստանի տարածքում վերահսկողություն սահմանելու մասին, իսկ սեպտեմբերի 7-ին հայտարարեցին ժամանակավոր կառավարության կազմը, որի օրինականությունը դեռևս ոչ մի երկիր չի ճանաչել։
