ԱՄՆ նախագահ Ջո Բայդենը ծրագրում է հանդիպել Ուկրաինայից փախստականների հետ այս շաբաթ Լեհաստանի Հանրապետություն կատարելիք այցի ընթացքում:
Այս մասին նա հայտարարել է Բրյուսելում կայացած մամուլի ասուլիսի ժամանակ, փոխանցում է Ukrinform-ի թղթակիցը։
«Ես նախատեսում եմ տեսնել այդ մարդկանց, և հուսով եմ, որ կարող եմ հանդիպել նրանց հետ»,- ասել է Սպիտակ տան ղեկավարը։
Նա նշել է, որ անվտանգության նկատառումներից ելնելով չի կարող հստակ ասել, թե Լեհաստանում որտեղ է մտադիր շփվել ուկրաինացի փախստականների հետ։ Սակայն նա հույս է հայտնել, որ կտեսնի նրանցից շատերին։
Ինչպես հաղորդում է Ukrinform-ը, ԱՄՆ նախագահ Ջո Բայդենը ծրագրում է այց կատարել Լեհաստան հինգշաբթի օրը Բրյուսելում ՆԱՏՕ-ի, ԵՄ-ի և G7-ի ձևաչափերի համաշխարհային առաջնորդների հետ հանդիպումներից հետո։ Սպասվում է, որ այնտեղ նա կհանդիպի Լեհաստանի Հանրապետության նախագահ Անջեյ Դուդայի հետ և կքննարկի հումանիտար ճգնաժամին, ինչպես նաև Ուկրաինայում ռուսական պատերազմի այլ հետևանքների համատեղ արձագանքման հարցեր։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
