ՀՀ կառավարության 2011 թվականի օգոստոսի 25-ի N 1295-Ն որոշումը սահմանում է օտարերկրացիների նախնական և միջին մասնագիտական հաստատություններ ՀՀ-ում ընդունելության կարգը: Այսպես, օտարերկրացիների հաստատություն ընդունելությունը կատարվում է Հայաստանի Հանրապետության կառավարության հաստատած մասնագիտությունների ցանկին (բացառությամբ ռազմական և ոստիկանական նախնական (արհեստագործական) և միջին մասնագիտական կրթության) համապատասխան:
Օտարերկրացիների ընդունելությունը հաստատություն կատարվում է` պայմանագրային հիմունքով: Հայաստանի Հանրապետության և օտարերկրյա պետությունների միջև կնքված կրթական և գիտական համագործակցության մասին Հայաստանի Հանրապետության միջազգային պայմանագրերի հիման վրա:
Օտարերկրացիները, որոնք ցանկանում են սովորել Հայաստանի Հանրապետությունում, պետք է Հայաստանի Հանրապետության կրթության և գիտության նախարարություն (այսուհետ` նախարարություն) ներկայացնեն հետևյալ փաստաթղթերը`
ա. դիմում` Հայաստանի Հանրապետության կրթության և գիտության նախարարի անունով
բ. նախարարության կողմից տրամադրված դիմում-հարցաթերթիկ` համաձայն ձևի
գ. անձնագրի կամ ծննդյան վկայականի բոլոր էջերի պատճենները և (կամ) մկրտության վկայականը
դ. կրթական աստիճանի ավարտական փաստաթղթի պատճենը.
ե. 3 x 4 չափսի 4 լուսանկար.
զ. ինքնակենսագրություն (CV)` հայերենով, ռուսերենով կամ անգլերենով:
Փաստաթղթերը նախարարություն ներկայացվում են` դիմորդի կողմից անձամբ կամ նրա լիազորված անձի կողմից, ուսումնական հաստատության կողմից, օտարերկրյա պետություններում Հայաստանի Հանրապետության դիվանագիտական ներկայացուցչությունների միջոցով, փոստով (այդ թվում` էլեկտրոնային փոստով)` նախարարության պաշտոնական հասցեով:
Օտարերկրացիները, որոնք չեն տիրապետում հայերենին, ռուսերենին կամ անգլերենին մասնակցում են հաստատության նախապատրաստական դասընթացներին:
