Հայաստանի փաստաբանների պալատի նորընտիր նախագահի լիազորությունների ստանձման արարողության ժամանակ ՓՊ առաջին նախագահ Ռուբեն Սահակյանը խնդրեց իր հանդեպ ներողամիտ լինել, քանի որ ՓՊ նախագահի պաշտոնում սխալներ էլ է գործել:
«Ամեն դեպքում ես երբեմն եղել եմ կոպիտ, պոռթկացել եմ, կարծր եմ եղել, բայց սրտումս ոչինչ չի մնացել, հավատացեք: Ես հանգիստ խղճով եմ թողնում իմ պաշտոնը. ուրախությամբ այն հանձնում եմ Պալատի նորընտիր նախագահին»,- ասաց Ռուբեն Սահակյանը:
Նա շնորհակալություն հայտնեց Փաստաբանների պալատի հաշվիչ հանձնաժողովի անդամներին, նույն հանձնաժողովի նախագահ Ապետնակ Պողոսյանին Փաստաբանների պալատի նախագահի ընտրությունները հաջող կազմակերպելու և անցկացնելու համար. Գերմանիայի միջազգային համագործակցության ընկերությունը (GIZ) բավականին բարձ գնահատական է տվել ընտրություններին:
«Ես սրտանց շնորհավորում եմ Արա Զոհրաբյանին իր լիազորությունների ստանձման կապակցությամբ: Համոզված եմ, որ նոր նախագահի գալստյամբ փաստաբանական համայնքը միայն ու միայն դրական փոփոխություններ կունենա: Այդ փոփոխությունները, ես համոզված են, Դուք կզգաք առաջիկա մի քանի ամիսների ընթացքում, որովհետև նա աշխատանքները սկսել է դեռևս ընտրման օրվանից, ոչ թե այսօրվանից»,- նշեց ՓՊ առաջին նախագահ Ռուբեն Սահակյանը:
Վերջինս բոլորին կոչ արեց հավատով լցվել և հավատալ Արա Զոհրաբյանին. «Անձամբ ես իմ աջակցությունը ցուցաբերելու եմ, բազմիցս ասել եմ»: Վերջում Փաստաբանների պալատի նախկին նախագահ Ռուբեն Սահակյանը շնորհակալություն հայտնեց բոլոր նրանց, ում հետ վերջին 8 տարիներին աշխատել է:
Հիշեցնենք, որ Հայաստանի փաստաբանների պալատի նախագահի 2013 թվականի սեպտեմբերի 14-ին տեղի ունեցած ընտրությունների ժամանակ քվեարկության իրավունք ունեցող 1370 փաստաբաններից ընտրություններին մասնակցած 913 փաստաբաններից 713-ն իրենց ձայնը տվել էին Արա Զոհրաբյանին:
Իրավաբան.net
