Ծանրամարտի Եվրոպայի մեծահասակների առաջնությունն այս տարի անցկացվելու է Հայաստանում՝ Երևանում, Կ. Դեմիրճյանի անվան մարզահամերգային համալիրում ապրիլի 15-23-ը: Բացման արարողությունը նախատեսված է ապրիլի 14-ին: Երևանում կայանալիք մրցաշարը վարկանիշային է լինելու Փարիզի 2024 թվականի Օլիմպիական խաղերի համար:
ԿԳՄՍ նախարարությունը մարտի 17-ին կազմակերպած միջոցառմանը ներկայացրել է առաջնության խորհրդանիշը՝ հայկական մուֆլոնը, որի եղջյուրների վեր խոյացող ուրվագիծը հիմք է հանդիսացել ստեղծելու այս տարվա Եվրոպայի առաջնության պատկերանիշը:
Iravaban.net-ը գրավոր հարցմամբ դիմել է ԿԳՄՍՆ-ին՝ առաջնության խորհրդանիշի վերաբերյալ որոշ մանրամասներ ճշտելու համար։
Ի պատասխան հարցման, ԿԳՄՍ փոխնախարար Կարեն Գիլոյանը հայտնել է․
«2023 թվականի ապրիլին Երևանում կայանալիք ծանրամարտի Եվրոպայի մեծահասակների առաջնության անցկացման համար կազմակերպված մրցույթի հաղթողը, այդ թվում` առաջնության խորհրդանիշը, ընտրվել են Հայաստանի Հանրապետության վարչապետի աշխատակազմի կողմից Եվրոպայի առաջնության կազմակերպման հետ կապված ծառայությունների ձեռքբերման նպատակով «ՀՀՎԱ-ԵՄԾՁԲ-23/1» ծածկագրով կազմակերպված երկու փուլով մրցույթի ընթացակարգի արդյունքում:
Ի կատարումն ՀՀ կառավարության 29.12.2022թ թիվ 2111-Ն որոշման 1-ին կետի 15-րդ ենթակետի՝ մրցույթի ընտրված մասնակից ճանաչված «Բեգրաունդ Փրոդաքշն» ՍՊԸ-ի հետ ՀՀ կրթության, գիտության, մշակույթի և սպորտի նախարարության կողմից 09.03.2023թ կնքվել է սպորտային միջոցառումների կազմակերպման ծառայությունների գնման թիվ «ՀՀՎԱ-ԵՄԾՁԲ-23/1-1» ծածկագրով պայմանագիրը»։
Նախարարությունից հայտնել են նաև, որ խորհրդանիշի պատրաստման գինն առանձնացված չէ կնքված պայմանագրում և ներառված է ծառայությունների մատուցման ընդհանուր գնի մեջ:
Փաստաղթղերից պարզ է դառնում, որ նախարարության հայտարարած մրցույթին մասնակցելու համար հայտ է ներկայացրել 4 կազմակերություն։ Ստորև պատկերներում նշված է կազմակերպությունների ներկայացրած գնառաջարկն ու հաղթող կազմակերպության ընտրության ընթացքի վերաբերյալ մանրամասներ։
Հաղթող ընկերության՝ «Բեգրաունդ Փրոդաքշն» ՍՊԸ-ի հետ կնքված պայմանագրից պարզ է դառնում, որ ընդհանուր ծառայության համար նախարարությունը փուլային եղանակով կվճարի 1․160․000․000 դրամ։
![](https://iravaban.net/wp-content/uploads/2023/03/kg-3.png)
Պայմանագիրն ամբողջությամբ՝ ստորև․
Թեև պայմանագրում նշված է, թե համաձայն ծանրամարտի միջազգային կանոնակարգի, առաջնության կազմակերպման շրջանակներում ինչ է անհրաժեշտ նախատեսել, ու ինչ ծառայություններ են մատուցվելու, սակայն յուրաքանչյուր ծառայության համար առանձնացված արժեք նշված չէ։
Պայմանագրում նշվում է նաև, որ Երևանում անցկացվելիք ծանրամարտի մեծահասակների Եվրոպայի առաջնության կազմակերպման և միջոցառման անցկացման նպատակը միջազգային հարթակներում Հայաստանն էլ ավելի ճանաչելի դարձնելն է, ինչը կխթանի ծանրամարտի մարզաձևի զարգացմանը և մասսայականացմանը, արդյունքային ցուցանիշների բարձրացմանը, արդյունքային ցուցանիշների բարձրացմանը, մրցանակային տեղերի գրավմանը, որը հնարավորություն կընձեռի հետագայում ևս նմանատիպ միջոցառումների անցկացումը Հայաստանի Հանրապետությունում։
————————
Հիշեցնենք, որ մարտի 1-ին ազդարարվեց նաև Եվրոպայի մեծահասակների առաջնության հետհաշվարկի ժամացույցի մեկնարկը:
«Մեր լեռնաշխարհի ամենագեղեցիկ կենդանիներից մեկը դարձել է առաջնության խորհրդանիշը և այստեղ ներկայացվում է որպես ծանրորդ»,- իր խոսքում նշել է ծանրամարտի Եվրոպայի 2023 թ․ առաջնության կազմկոմիտեի նախագահ, ՀՀ վարչապետի աշխատակազմի նախագահ Արայիկ Հարությունյանը:
ԿԳՄՍ նախարարի տեղակալ Կարեն Գիլոյանն էլ կազմակերպիչներին խնդրել է առաջնության հետհաշվարկի ավարտից հետո Հյուսիսային պողոտայում տեղադրված ցուցատախտակին պատկերել հայ մարզիկների՝ Եվրոպայի առաջնության ընթացքում նվաճած մեդալներն այդ պահի դրությամբ։
ԿԳՄՍ նախարարությունից հայտնել են նաև, որ Կարապի լճի հարևանությամբ գործելու է նաև ֆան գոտի՝ իր շուրջը համախմբելով երկրպագուներին:
Ալիսա Չիլինգարյան
![](https://iravaban.net/wp-content/uploads/2023/03/337457702_960173898335443_4594591471469423001_n-2.jpg)
![](https://iravaban.net/wp-content/uploads/2023/03/New-Project-4-4.jpg)
![](https://iravaban.net/wp-content/uploads/2023/03/338564565_538722191709087_1118480839826513870_n-1.jpg)
![](https://iravaban.net/wp-content/uploads/2023/03/329732949_582363333858145_7467132729711976706_n-1.jpg)
![](https://iravaban.net/wp-content/uploads/2023/03/338374637_1746021399147039_4694077438214229453_n-1.jpg)
![](https://iravaban.net/wp-content/uploads/2023/03/338477604_6014574655297662_3426672538987440439_n-1.jpg)