Թուրքիայի նախագահ Ռեջեփ Թայիփ Էրդողանը հայտարարել է, որ զենք վաճառողների մեծ մասը հետաքրքրված է Ուկրաինայում ստեղծված իրավիճակով, միայն այն պատճառով, որ մեծ շահույթներ ստանան։ Այս մասին գրում է РИА Новости-ն։
«Ահա, թե ինչ են նրանք արել ռուս-ուկրաինական պատերազմում։ Աշխարհը որևէ կերպ միջամտե՞լ է։ Ոչ, նրանք բոլորն օգնում են զենք վաճառողներին, նրանց հետաքրքրում է, թե աշխարհում զենք վաճառողները ինչպես կշահեն, որտեղից կշահեն և ինչ կշահեն: Իսկ մեզ հետաքրքրում է, թե ինչպես կարող ենք ապահովել աշխարհի խաղաղությունը։ Մի օր մենք կհանդիպենք պարոն Պուտինի և պարոն Զելենսկիի հետ։ Մենք փորձում ենք հասկանալ, թե ինչպես կարելի է նրանց հաշտեցնել։ Մենք անկեղծորեն շարունակում ենք մեր ճանապարհը, որովհետև մենք գիտենք, որ աշխարհը կարող է վերելք ապրել միայն խաղաղության պայմաններում»,- ասել է Էրդողանը։
Հիշեցնենք, որ 2022 թվականի փետրվարի 24-ից Ռուսաստանը ռազմական գործողություն է իրականացնում Ուկրաինայում, որի նպատակը Պուտինը անվանել է Դոնբասի ազատագրումը, ինչպես նաև նրա անվտանգությունը երաշխավորող պայմանների ստեղծումը։ Այս ֆոնին ԱՄՆ-ը և ՆԱՏՕ-ի նրա դաշնակիցները շարունակում են աջակցել Կիևին։
