Ինչպես Iravaban.net-ը տեղեկանում է Դատալեքս դատական տեղեկատվական համակարգից, Երևան քաղաքի առաջին ատյանի ընդհանուր իրավասության դատարանում քննվում է քաղաքացի Մ.Դ.-ի հայցն ընդդեմ «Վեոլիա Ջուր» ՓԲ ընկերության:
Հայցի էությունը
Հայցվորը պահանջում է պարտավորեցնել «Վեոլիա Ջուր» ՓԲԸ-ին կատարելու 2021թ. մարտի 26-ին կնքված պայմանագրով ստանձնած պարտականությունները: Մասնավորապես, խոսքը գնում է պայմանագրի 2-րդ կետով և 6-րդ կետի 1-ին ենթակետով նախատեսված պարտավորությունների մասին, որոնք, ըստ հայցվորի, ջրամատակարարման ընկերության կողմից չեն կատարվել:
Դատական ընթացակարգը
Հայցադիմումը ներկայացվել է 2025 թվականի սեպտեմբերի 2-ին՝ էլեկտրոնային համակարգի միջոցով: Գործը մակագրվել է դատավոր Ս. Խաչատրյանին: Ուսումնասիրելով հայցադիմումը՝ դատարանը պարզել է, որ այն համապատասխանում է ՀՀ քաղաքացիական դատավարության օրենսգրքի 16-րդ, 121-րդ և 122-րդ հոդվածների պահանջներին: ՀՀ քաղաքացիական դատավարության օրենսգրքի 126-րդ և 127-րդ հոդվածներով սահմանված հայցադիմումի ընդունումը մերժելու կամ այն վերադարձնելու հիմքերը բացակայում են:
Դատարանի որոշումը
Ղեկավարվելով ՀՀ քաղաքացիական դատավարության օրենսգրքի 125-րդ, 199-րդ, 200-րդ հոդվածներով՝ դատարանը որոշել է հայցադիմումն ընդունել վարույթ: Որոշումն օրինական ուժի մեջ է մտել կայացման պահից և ենթակա չէ բողոքարկման:
Նշենք, որ «Վեոլիա Ջուր» ՓԲ ընկերությունը Հայաստանում ջրամատակարարման և ջրահեռացման ծառայություններ մատուցող խոշորագույն ընկերություն է: