Թուրքիան և Հայաստանը բանակցությունների ընթացքում որոշել են վերացնել ուղղակի օդային բեռնափոխադրումների խոչընդոտները, հաղորդում է Habertürk հեռուստաալիքը՝ վկայակոչելով դիվանագիտական աղբյուրները։
«Դիվանագիտական աղբյուրների համաձայն՝ երկու երկրների հարաբերությունների կարգավորման գործընթացի հատուկ ներկայացուցիչների բանակցությունների արդյունքում վերացվել են խոչընդոտները Թուրքիայի և Հայաստանի միջև ուղիղ օդային բեռնափոխադրումների համար, ինչը հնարավոր է դարձել 2023 թվականի հունվարի 1-ից։ Աղբյուրները հայտնել են, որ Թուրքիայի առևտրի նախարարությունն այս որոշման մասին տեղեկացրել է թուրքական արտահանողների ասոցիացիային»,- հաղորդում է հեռուստաալիքը։
Նշենք, որ Թուրքիայի և Հայաստանի միջև դիվանագիտական հարաբերություններ չկան, երկու երկրների սահմանը փակ է 1993 թվականից՝ Անկարայի նախաձեռնությամբ։ Երկրների միջև բարդ հարաբերությունների պատճառ են հանդիսանում մի շարք հանգամանքներ, որոնք կապված են, մասնավորապես, Լեռնային Ղարաբաղի հարցում ադրբեջանական դիրքորոշման Անկարայի աջակցության և 1915թ. Օսմանյան կայսրությունում Հայոց ցեղասպանության միջազգային ճանաչման գործընթացին Թուրքիայի կտրուկ արձագանքի հետ։
Հունվարի 14-ին Մոսկվայում տեղի ունեցավ Հայաստանի և Թուրքիայի միջև հարաբերությունների կարգավորման գործընթացի հատուկ ներկայացուցիչների առաջին հանդիպումը՝ Ազգային ժողովի փոխնախագահ Ռուբեն Ռուբինյանի և ԱՄՆ-ում Թուրքիայի նախկին դեսպան Սերդար Քըլըչի հետ։
