Հյուսիսային Կորեան ութ փոքր հեռահարության բալիստիկ հրթիռ է արձակել դեպի Ճապոնական ծով: Այս մասին հայտնել են Հարավային Կորեայի շտաբների պետերի միացյալ կոմիտեից, փոխանցում է «ՌԻԱ Նովոստին»։

«Հարավային Կորեայի բանակն այսօր՝ հունիսի 5-ին, ժամը 9:08-ից մինչև 9:43-ը (Մոսկվայի ժամանակով 3:08-ից մինչև 3:43-ը) գրանցել է Հյուսիսային Կորեայի կողմից փոքր հեռահարության բալիստիկ հրթիռների ութ արձակում Փհենյանի Սունան օդանավակայանի տարածքից և այլ վայրերից»,- հայտնել են զինվորականները:

Նշվում է, որ հարավկորեացի զինվորականները ԱՄՆ-ի հետ համագործակցությամբ պահպանում են պաշտպանական պատրաստվածությունը և վերահսկում զարգացումները։ Ճապոնիայի պաշտպանության նախարարության տվյալներով՝ արկերը թռել են 300-ից 400 կիլոմետր, առավելագույն բարձրությունը եղել է 50-ից 100 կիլոմետր։

Այնուամենայնիվ, Հարավային Կորեայի միացյալ շտաբի պետերը կարծում են, որ հրթիռները անցել են 110-ից 670 կիլոմետր, իսկ առավելագույն բարձրությունը եղել է 25-ից 90 կիլոմետր:

Նշենք, որ սա ԿԺԴՀ-ի 18-րդ հրթիռային փորձարկումն է տարեսկզբից՝ ներառյալ ICBM-ների, սուզանավերի բալիստիկ հրթիռի, տիեզերական արբանյակի համակարգերի և միջուկային զենքի մարտավարական նոր համակարգի փորձարկումները։

Վերջին անգամ ԿԺԴՀ-ն երեք բալիստիկ հրթիռ է արձակել Ճապոնական ծովի ուղղությամբ մայիսի 25-ի առավոտյան։