Անկախության սերնդի ներկայացուցիչներին կոչ եմ անում այսօր 19։30-ին գտնվել Ազատության հրապարակում՝ գեներացնելու մեր գաղափարները՝ կապված Արցախը որպես բացարձակ արժեք ընկալելու, հարկ եղած դեպքում նաև պաշտպանելու համար, այս մասին այսօր՝ ապրիլի 21-ին, լրագրողների հետ ճեպազրույցում ասաց Արցախյան 44-օրյա պատերազմի մասնակից Մնացական Ավետիսյանը։
«Անհամեստություն չլինի, մարդիկ ինձ ճանաչում են 44-օրյա պատերազմից և կարծում եմ, որ այդ ամենը պետք է հասցեագրված լինի և ավելի հասանելի լինի»,-ասաց նա։
Մնացական Ավետիսյանի խոսքով՝ մարտի դաշտում իրենք պահում էին խրամատը, Ազատության հրապարակում պահում են այն գաղափարը, որի համար կռվել են։
«Մեր նպատակն է հավաքել անկախության սերնդին։ Պետք է հասկանան անկախության սերնդի և ընդհանրապես մեր հայրենակիցների գաղափարները, մտածելակերպը և ցանկություններն Արցախի կարգավիճակի շուրջ», – ասաց Մնացական Ավետիսյանը։
Նա ընկերներին կոչ արեց դադարեցնել հացադուլը.
«Հուսով եմ, որ այսօր ականատես կլինենք ավելի լայն շերտերի արձագանքի։ Կարծում եմ, որ այն խնդիրը, որն ի սկզբանե դրել էին Արթուրը և Նվերը, հասունանում է, աճի գրանցման փուլում է»։
Մանրամասները՝ տեսանյութում։
