Ռուսաստանի Դաշնության Առողջապահության նախարարությունը գրանցել է կորոնավիրուսի դեմ «Կոնվասել» պատվաստանյութը, որը մշակվել է Ռուսաստանի Դաշնային բժշկական և կենսաբանական գործակալության պատվաստանյութերի և շիճուկների գիտահետազոտական ինստիտուտի կողմից (FMBA): Այս մասին հայտնում է «ՏԱՍՍ» լրատվական գործակալությունը:
«Կոնվասել»-ը ռեկոմբինանտ ենթամիավորի պատվաստանյութ է, որը նախատեսված է SARS-CoV-2 կորոնավիրուսային վարակի կանխարգելման համար։
Գրանցամատյանում առկա տեղեկատվության համաձայն՝ պատվաստանյութը լույսից պաշտպանված վայրում 2-ից 8 աստիճան ջերմաստիճանի դեպքում ունի 6 ամիս պահպանման ժամկետ։ Դեղը միջմկանային ներարկման էմուլսիա է, մեկ դոզայի ծավալը 0,5 մլ է։
Ավելի վաղ FMBA-ի ղեկավար Վերոնիկա Սկվորցովան ասել էր, որ պատվաստանյութը ալերգիա չի առաջացնում:
2021 թվականի հունիսին ավարտվել են պատվաստանյութի նախակլինիկական ուսումնասիրությունները, որոնց արդյունքում ապացուցվել է դրա անվտանգությունը, իմունոգենությունը և պաշտպանիչ ներուժը։
