Ամերիկայի միացյալ նահանգների Սենատը հավանություն է տվել Ուկրաինային 13,6 միլիարդ դոլարի օգնության հատկացմանը։ Այս մասին տեղեկանում ենք Украинская правда-ից:
Այդ գումարի մոտ կեսն ուղղվում է Ուկրաինային զինելուն, ինչպես նաև Պենտագոնի ծախսերին՝ ամերիկյան զորքեր ուղարկելու արևելյան Եվրոպայի այլ երկրներ։ Մնացած գումարները ներառում են մարդասիրական և տնտեսական օգնություն, տարածաշրջանում դաշնակիցների պաշտպանության ուժեղացում և նրանց էներգետիկ ռեսուրսների և կիբերանվտանգության կարիքների պաշտպանություն:
Փաստաթուղթն այժմ ուղարկվել է ԱՄՆ նախագահ Ջո Բայդենին ստորագրության համար: Ավելի վաղ նա ասել էր, որ պատրաստ է ստորագրել օրինագիծը։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
