Ռուսաստանի նախագահ Վլադիմիր Պուտինը, Ֆրանսիայի նախագահ Էմանուել Մակրոնը և Գերմանիայի կանցլեր Օլաֆ Շոլցը հեռախոսազրույց են ունեցել, հայտնել է ՌԴ նախագահի մամուլի քարտուղար Դմիտրի Պեսկովը։
«Շարունակել են քննարկել Ուկրաինայի թեման»,- լրագրողներին ասել է Պեսկովը։
Նախորդ օրերին Պուտինը բազմիցս զրուցել է այլ պետությունների և միջազգային կազմակերպությունների ղեկավարների հետ՝ նրանց հետ, ի թիվս այլ հարցերի, քննարկելով Ուկրաինայում տիրող իրավիճակը։
Մասնավորապես, զրույցներ են տեղի ունեցել Եգիպտոսի, Իսրայելի, Հնդկաստանի, Սենեգալի ղեկավարների, ինչպես նաև Եվրոպական խորհրդի նախագահի հետ։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
