Չինաստանի նախագահ Սի Ծինփինը հեռախոսազրույց է ունեցել ՌԴ նախագահ Վլադիմիր Պուտինի հետ։ Այս մասին ուրբաթ հայտնել է Չինաստանի կենտրոնական հեռուստատեսությունը։
Ծինփինը փետրվարի 25-ի ցերեկը հեռախոսազրույց է ունեցել Պուտինի հետ։
Չինաստանը կոչ է արել ուկրաինական հարցում հեռանալ սառը պատերազմի մտածելակերպից, ինչպես նաև ձևավորել եվրոպական անվտանգության ապահովման կայուն և արդյունավետ մեխանիզմ։
«Անհրաժեշտ է հրաժարվել «սառը պատերազմի» մտածելակերպից, հաշվի առնել և հարգել երկրների օրինական մտահոգությունները անվտանգության ոլորտում՝ բանակցությունների միջոցով ձևավորելու հավասարակշռված, արդյունավետ և կայուն մեխանիզմ», – մեջբերում է Չինաստանի Կենտրոնական հեռուստատեսությունը։
Չինաստանի կառավարությունը կողմ է Ռուսաստանի և Ուկրաինայի միջև տարաձայնությունները բանակցությունների միջոցով կարգավորելուն։
«Չինական կողմը աջակցում է Ռուսաստանի և Ուկրաինայի միջև բանակցությունների միջոցով կարգավորմանը», – նշել է Չինաստանի նախագահը։
Սի Ծինփինը և Պուտինը մտքեր են փոխանակել Ուկրաինայում տիրող իրավիճակի շուրջ։
Պուտինը Սի Ծինփինին ներկայացրել է ուկրաինական խնդրի պատմությունը և Ուկրաինայի արևելքում ռազմական հատուկ գործողության մանրամասները։
