Երևանի ավագանին փետրվարի 8-ի նիստին որոշում կընդունի Լևոն Ներսիսյանի անվամբ փողոց անվանակոչելու մասին։
Որոշման նախագծում ասվում է․
«Երևան քաղաքի Քանաքեռ-Զեյթուն վարչական շրջանի Հրաչյա Ներսիսյան փողոցից դեպի Ավետիս Ահարոնյան փողոց ձգվող ճանապարհահատվածն անվանակոչել գրականագետ, դերասան և ԵՊՀ ռոմանագերմանական ֆակուլտետի դոցենտ Լևոն Ներսիսյանի անվամբ՝ «Լևոն Ներսիսյան փողոց»»։
Որոշման նախագիծը ներկայացրել է ավագանու անդամ Իզաբելլա Աբգարյանը, իր և ԵՊՀ մի խումբ շրջանավարտների անունից։
Նշվում է նաև, որ դեկտեմբերի 24-ին կնշվի Լևոն Ներսիսյանի 90-ամյա հոբելյանը: Լևոն Հրաչյայի Ներսիսյանը (1931-1999թթ.) ունենալով մեծ ավանդ գրականագիտության և գեղագիտության զարգացման ոլորտում, ինչպես նաև տաղանդավոր դերակատարմամբ հանդես գալով «Երկունք», «Ապրիլ», «Երջանկության մեխանիկա», «Վերածնունդ» ֆիլմերում, միևնույն ժամանակ անջնջելի հուշեր է թողել ԵՊՀ ռոմանագերմանական բանասիրության ֆակուլտետում իր դասախոսություններին երբևէ մասնակցած սերունդների մոտ:
Բանավոր խոսքի արտիստական բարձր վարպետությամբ անցկացվող նրա դասախոսություններին ներկա էին լինում ոչ միայն ռոմանագերմանական ֆակուլտետի, այլ՝ ԵՊՀ այլ ֆակուլտետների, նույնիսկ՝ այլ բուհերի ուսանողները: Հաղորդակցման բացառիկ տաղանդով օժտված Լևոն Ներսիսյանին արդարացիորեն կարել է դասավանդման վարպետության գործում մինչ օրս չգերազանցված ֆենոմեն համարել: ԵՊՀ բանասիրության ֆակուլտետում ուսանողների կուռքը դարձած Լևոն Ներսիսյանի անվամբ անվանակոչվել է լսարան:
1994 թ.-ին Լևոն Ներսիսյանը պարգևատրվել է Մովսես Խորենացու մեդալով: Լևոն Ներսիսյանը մահացել է 1999 թվականին:
Մեծանուն հոր՝ Հրաչյա Ներսիսյանի անվան փողոցից սկիզբ առնող այս հատվածը որդու՝ Լևոն Ներսիսյանի անվամբ անվանակոչելն այդ տաղանդաշատ ընտանիքի յուրահատուկ տոհմածառային քարտեզ կխորհրդանշի Երևան համայնքում, որտեղ ապրել և ստեղծագործել են մեծանուն հայրը և որդին:
