Ադրբեջանի Հանրապետության արտաքին գործերի նախարարությունը, արձագանքել է Իրանի Իսլամական Հանրապետության արտաքին գործերի նախարար, Հոսեյն Ամիր Աբդոլլահյանի այն հայտարարությանը, թե Թեհրանը երբեք չի հանդուրժի իր սահմաններում «Սիոնիստական ռեժիմի» գոյությունը:
Ադրբեջանի արտգործնախարարության մամուլի խոսնակ, Լեյլա Աբդուլաևայի խոսքով՝ պաշտոնական Բաքուն անհիմն է համարում իրանական կողմի պնդումները ադրբեջանա-իրանական սահմանին երրորդ, օտար ուժի առկայության մասին:
«Մենք որևէ հայտարարություն չենք ընդունում ադրբեջանա-իրանական սահմանին երրորդ ուժի առկայության և այս ուժի սադրիչ փորձերի մասին, քանի որ այդ խոսակցությունները որևէ հիմք չունեն: Ընդհանուր առմամբ, Ադրբեջանի տարածքում ցանկացած ուժի, այդ թվում ՝ ահաբեկչական տարրերի առկայությունը, որը կարող է սպառնալիք հանդիսանալ մեր պետության կամ հարևան երկրների համար, չի կարող քննարկման առարկա դառնալ»,-ասել է Աբդուլաևան:
Նա ասել է, որ նման մեղադրանքներն անհիմն են և ոչ մի ապացույց չի ներկայացվել ադրբեջանական կողմին: Ըստ Աբդուլաևայի, Ադրբեջանը միշտ առաջնորդվել է միջազգայնորեն ճանաչված սահմանների անձեռնմխելիության սկզբունքով:
«Ադրբեջանը տասնամյակներ շարունակ ապրել է իր տարածքի ռազմական օկուպացիա և միջազգայնորեն ճանաչված սահմանների խախտում: Մասնավորապես, Իրանի հետ մեր սահմանի ավելի քան 130 կիլոմետրը գտնվում էր հայկական օկուպացիայի ներքո: Ցավոք, մենք տարիներ շարունակ չենք լսել բարեկամ Իրանի նման կոշտ արձագանքը մեր սահմանի մի մասի բռնազավթման կապակցությամբ», – ասել է Աբդուլաևան:
«Ինչ վերաբերում է Ադրբեջանում արտաքին միջամտության վերաբերյալ տեսակետներին, մենք կցանկանայինք նշել, որ մեր պետությունը միշտ վարել է անկախ արտաքին քաղաքականություն ՝ հիմնված ազգային շահերի վրա, և դա բազմիցս հաստատվել է կոնկրետ քայլերով վերջին 30 տարիների ընթացքում: Հարևան երկրների հետ բարեկամական և բարիդրացիական հարաբերությունների զարգացումը մեր արտաքին քաղաքականության հիմնական առաջնահերթություններից է, և մենք անընդհատ քայլեր ենք ձեռնարկում այդ ուղղությամբ»,- ավելացրեց ԱԳ նախարարության ներկայացուցիչը:
