Այսօր Ազգային ժողովում տեղի ունեցավ հերթական նիստը, որի ընթացքում Ազգային ժողովը առաջին ընթերցմամբ ընդունեց «Տեսալսողական մեդիայի մասին» օրենքում փոփոխություններ կատարելու նախագիծը, որի նպատակն է հանրային հեռարձակողների նվազագույն թիվը երեքից դարձնել երկու։ Նախաձեռնության հեղինակներն են «Քաղաքացիական պայմանագիր» խմբակցության պատգամավորներ Սիսակ Գաբրիելյանը և Թագուհի Ղազարյանը։ Iravaban.net-y տեղեկանում է Ազգային ժողովից։
Քննարկման ընթացքում Թագուհի Ղազարյանը նշել է, որ նախորդ տարիներին հանրային հեռարձակողներից մեկը՝ «Շողակաթ» հեռուստաընկերությունը, պետական բյուջեից շուրջ 3 միլիարդ դրամ է ստացել մեկ անձից գնումների միջոցով՝ առանց մրցույթի, ինչը, նրա գնահատմամբ, արդյունավետ միջոցների օգտագործում չէ։
Նախագծի հեղինակների խոսքով՝ փոփոխությունները կնպաստեն, որ կրթական և մշակութային բովանդակության համար նախատեսված պետական միջոցները բաշխվեն մուլտիպլեքսի բոլոր հեռուստաընկերությունների միջև՝ ապահովելով հավասար մրցակցային պայմաններ և բովանդակության բազմազանություն։
Օրենքի նախագիծը ընդունվել է 63 «կողմ» և ընդդիմադիր պատգամավորների 31 «դեմ» ձայներով։
