Սահմանադրական դատարանում այսօր՝ հուլիսի 14-ին, արդեն 6-րդ օրն է ինչ շարունակվում է հունիսի 20-ի արտահերթ ընտրությունների արդյունքների վիճարկման դիմումների քննությունը:
Կողմերը հանդես են գալիս եզրափակիչ ելույթներով։ «Պատիվ ունեմ» դաշինքի ներկայացուցիչ Դավիթ Հարությունյանի եզրափակիչ խոսքից հետո ՍԴ նախագահ Արման Դիլանյանը մեկնաբանությամբ հանդես եկավ՝ նշելով․
«Մարդկայնորես ես հասկանում եմ Ձեզ, մարդկայնորեն հասկանում եմ Ձեր ընտրած մարտավարությունը, մարդկայնորեն հասկանում եմ ՍԴ-ին վարկաբեկելու և այդպիսով ՍԴ-ի ապագա որոշումը վարկաբեկելու Ձեր փորձերը։ Մարդկայնորեն այդ մարտավարությունը հասկանում եմ, բայց չեմ ընդունում և ինձ համար դա դատապարտելի է։
Սահմանադրական դատարանում, այս Բարձր դատարանում դատավարությունը հետաքրքրությունների կամ առանձին կասկածների բավարարման համար չէ, ՍԴ-ում այս տեսակի գործերի քննությունն ուղղված չէ առանձին միավոր փաստերի վերաբերյալ կասկածները կամ ենթադրությունները փարատելուն, այստեղ քննվում է ընտրությունների կապակցությամբ ընդունված որոշման հետ կապված վեճը, ընտրություններ, որին մասնակցել են Հայաստանի Հանրապետության գրեթե մեկ միլիոն երեք հարյուր հազար քաղաքացի։ Ընտրությունների կազմակերպման և անցկացման ընթացում ձևավորվել են իրավահարաբերություններ, որոնց մասնակիցն են բազմահազար ցուբյեկտներ»,-ասաց Արման Դիլանյանը։
Մանրամասները՝ տեսանյութում
