Թուրքիայի պաշտպանության նախարարությունը թվիթերյան իր էջում օգտագործել է «ցեղասպանություն» բառն՝ արձագանքելով Լատվիայի խորհրդարանի կողմից Հայոց ցեղասպանությունը ճանաչող հռչակագրի ընդունմանը, ապա, մի քանի րոպե անց, հեռացրել գրառումը: Այս մասին հայտնում է հունական Greek City Times կայքը՝ հրապարակելով Թուրքիայի պաշտպանության նախարարության թվիթերյան գրառման սքրինշոթը:
«Մենք մերժում և չենք ճանաչում Լատվիայի խորհրդարանի որոշումը ցեղասպանության մասին», – գրված էր Թուրքիայի ՊՆ թվիթերյան էջում:
Greek City Times-ը նշում է, որ սա, թերևս, առաջին դեպքերից մեկն է, երբ Անկարան օգտագործում էր «ցեղասպանություն» եզրույթը, ինչից սովորաբար խուսափում է, և հատկապես անսովոր է, քանի որ այն օգտագործել է Թուրքիայի պաշտպանության նախարարությունը:
