Փետրվարի 13-ին Ճապոնիայում երկրաշարժ է գրանցվել: Առնվազն 30 մարդ վիրավորվել է:
Այս մասին հայտնում է «ՏԱՍՍ» լրատվական գործակալությունը։
Երկրաշարժը տեղի է ունեցել Ճապոնիայի ժամանակով 23:08-ին Ֆուկուսիմա պրեֆեկտուրայից հյուսիս-արևելք՝ Խաղաղ օվկիանոսում:
Ի սկզբանե հայտարարվել էր երկրի ազգային օդերևութաբանական վարչության կողմից։ Երկրաշարժի ուժգնությունը կազմում էր 7,1 բալ, բայց հետագայում այն հասել է 7,3-ի:
Երկիրը հայտարարեց ցունամիի սպառնալիքի մասին, բայց հետո այդ նախազգուշացումը չեղարկվեց:
Տոկիոյում՝ ՏԱՍՍ-ի ներկայացուցչության շենքում, մեկ րոպեից ավելի տևած ցնցումների պատճառով ընկել են սարքավորումները, կահույքը, իսկ ամբողջ շենքում գործարկվել է գազի վթարային անջատման համակարգ:
Ուժեղ ցնցումներ են զգացվել Ճապոնիայի հյուսիսային, հյուսիսարևելյան և կենտրոնական մասի 10 պրեֆեկտուրաներում, այդ թվում ՝ Ֆուկուսիմայում, Միյագիում և մայրաքաղաքի տարածքում:
Երկրաշարժերն այժմ դադարել են, բայց օդերևութաբանները նախազգուշացնում են հետցնցումների հավանականության մասին:
Երկրի նախարարների կաբինետի գլխավոր քարտուղար Կացունոբու Կատոն տեղի բնակչությանը հանդարտեցման կոչ է արել և շեշտել, որ երկրի իշխանություններն անում են ամեն ինչ ՝ բնական աղետի հետևանքները նվազագույնի հասցնելու համար:
Tokyo Electric Power էներգետիկ ընկերությունը հաղորդել է, որ երկրաշարժից հետո փորձագետները «Ֆուկուսիմա -1» ատոմակայանում արտակարգ իրավիճակներ չեն արձանագրել:
Միևնույն ժամանակ, երկրում դադարեցվել են մի քանի ջերմային էլեկտրակայաններ:
Շինկանսենի արագընթաց գնացքները դադարեցվել են մի քանի ուղղություններով:
Ճապոնիայի ազգային օդերևութաբանական վարչությունը հայտնել է, որ երկրաշարժը, հավանաբար, 2011-ի մարտի 11-ին տեղի ունեցած այսպես կոչված Մեծ Արևելյան Ճապոնիայի երկրաշարժի հետցնցում էր:
