Ազգային ժողովի պատգամավորներ Մերի Գալստյանը և Լենա Նազարյանը առաջարկում են «Տեղական ինքնակառավարման մասին» օրենքում լրացումներ և փոփոխություններ կատարել:
Նախագծով նախատեսվում է սահմանել համայնքում կենդանիների պաշտպանությունը և համայնքի ղեկավարի լիազորությունները կենդանիների նկատմամբ պատասխանատու վերաբերմունքի ոլորտում.
- Համայնքի ղեկավարը կենդանիների նկատմամբ պատասխանատու վերաբերմունքի ոլորտում կիրականացնի հետևյալ սեփական լիազորությունները,
- համաքաղաքային կանոններին համապատասխան` կտա քաղաքի տարածքում տնային կենդանիներ պահելու թույլտվություն և կկատարի դրանց ամենամյա հաշվառում,
- կիրականացնի համայնքի տարածքում պահվող կենդանիների նույնականացման անձնագրերի տրամադրում և կաջակցի անասնաբուժական գրանցամատյանների աշխատանքների վարմանը,
- կկազմակերպի համայնքի տարածքում թափառող կենդանիների բռնման և ստերջացման աշխատանքները,
- սահմանված կարգով կտրամադրի թույլտվություններ կենդանիների բուծարաններին և կացարաններին,
- կսահմանի համայնքի տարածքում անկած կենդանիների դիակների հավաքման, ոչնչացման և թաղման վայրերը՝ սահմանված սանիտարահիգիենիկ կանոններին համապատասխան:
Համայնքի ղեկավարը «Կենդանիների նկատմամբ պատասխանատու վերաբերմունքի մասին» օրենքի պահանջների պահպանման նկատմամբ պետական վերահսկողության բնագավառում կիրականացնի հետեւյալ սեփական լիազորությունները.
- «Կենդանիների նկատմամբ պատասխանատու վերաբերմունքի մասին» օրենքի պահանջների պահպանման նկատմամբ վերահսկողությունը կանոնակարգող իրավական ակտերի մշակում և իր իրավասության սահմաններում դրանց հաստատում,
- օրենքով սահմանված կարգով կիրականացնի վերահսկողություն և ստուգումներ կենդանիների պահման բոլոր վայրերում,
- կենդանի տիրապետողից կպահանջի և կստանա կենդանի պահելուն առչնվող ցանկացած տեղեկատվություն, բացատրություններ և փաստաթղթեր,
- կկազմի «Կենդանիների նկատմամբ պատասխանատու վերաբերմունքի մասին» օրենքի պահանջների խախտումների արձանագրությունները,
- խախտումների մասին եռօրյա ժամկետում կտեղեկացնի իրավապահ մարմիններին, միաժամանակ կձեռնարկի միջոցներ իրավախախտումը կանխելու համար,
Նախատեսվում է, որ «Կենդանիների նկատմամբ պատասխանատու վերաբերմունքի մասին» օրենքով սահմանված պահանջների խախտումը կառաջացնի տուգանքի նշանակում քաղաքացիների նկատմամբ` 50 հազարից մինչև 200 հազար դրամի չափով, իսկ պաշտոնատար անձանց նկատմամբ`100 հազարից մինչև 300 հազար դրամի չափով:
Կենդանիների նկատմամբ դաժան վերաբերմունքը կպատժվի տուգանքով` 100 հազարից մինչև 300 հազար դրամի չափով, կամ կալանքով` մեկից երեք ամիս ժամկետով, կամ ազատազրկմամբ՝ առավելագույնը մեկ տարի ժամկետով:
