Երևանի ընդհանուր իրավասության դատարանի Ավանի նստվայրում այսօր՝ փետրվարի 20-ին, դատավոր Դավիթ Հարությունյանի նախագահությամբ դատարանը հրապարակեց «Ֆլեշ» ՍՊԸ-ի նախագահ Բարսեղ Բեգլարյանի և «Ֆլեշ» ՍՊԸ-ի բազայի պետ Հրայր Հովսեփյանի պաշտպան Կրոմվել Գրիգորյանի ներկայացրած միջորդության վերաբերյալ որոշումը:
Հիշեցնենք, որ պաշտպանը միջնորդել էր, որպեսզի նախաքննության ընթացքում իր պաշտպանյալների նկատմամբ ընտրված խափանման միջոցը՝ ստորագրությունը՝ չհեռանալու մասին, վերացվի և նոր խափանման միջոց չընտրվի՝ հաշվի առնելով այն, որ «Էրեբունի-Երևանի հիմնադրման 2800-ամյակի և Հայաստանի Առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» օրենքով խափանման միջոցի կիրառումը չեղարկվում է:
Դատախազն այս միջնորդության դեմ առարկել էր:
Դատարանը որոշեց, որ համաներման օրենքի համատեքստում՝ Բեգլարյանի և Հովսեփյանի նկատմամբ կիրառված խափանման միջոցները, այսինքն, երաշխավորությունը և չհեռանալու մասին ստորագրությունը կիրառելու համար օրենքով նախատեսված իրավաչափ նպատակը բացակայում է կամ լիարժեք չէ:
«Բացակայում են խափանման միջոցի կիրառման հիմքերը»,- նշեց Դավիթ Հարությունյանը և վերացրեց գործով 2 ամբաստանյալների նկատմամբ ընտրված խափանման միջոցները, իսկ երաշխավորի վճարած 500 հազար դրամը կվերադարձվի վերջինիս:
Նշենք, որ կողմերից և ոչ մեկ չէր ներկայացել դատական նիստին՝ լինելով պատշաճ ծանուցված: Պատճառը աշխատանքային ծանրաբեռնավածությունն էր:
Մանրամասները՝ տեսանյութում
Հիշեցնենք, որ քրեական գործով մեղադրանք է առաջադրվել «Ֆլեշ» ՍՊԸ-ի նախագահ Բարսեղ Բեգլարյանին`բռնության գործադրմամբ, դրա գործադրման սպառնալիքով ինքնիրավչության համար, հայտնում են ՔԿ-ից:
Քրեական գործով ձեռնարկված միջոցառումների արդյունքում պարզվել է， որ Ն.Բեգլարյանին պատկանող «Ֆլեշ Մոտորս» ՍՊ ընկերությունից 2015թ. ընթացքում իրականացվել է առանձնապես խոշոր չափերի գույքի հափշտակություն, որի կատարման մեջ ընկերության սեփականատերն ու հարազատները մեղադրել են «Ֆլեշ Մոտորս» ՍՊ ընկերության նախկին կոմերցիոն տնօրենին և պահանջել վերականգնել ենթադրաբար պատճառված գույքային վնասը։
Ն.Բեգլարյանի հայրը՝ «Ֆլեշ» ՍՊԸ-ի սեփականատեր Բարսեղ Բեգլարյանը՝ հարազատների հետ միասին, ընկերության նախկին կոմերցիոն տնօրենին մեղադրել է յուրացումներ կատարելու մեջ, բռնության գործադրմամբ, ինչպես նաև կյանքի և առողջության համար վտանգավոր բռնություն գործադրելու սպառնալիքով պահանջել որպես վնասի փոխհատուցում անվանափոխել Երևան քաղաքի Ազատության պողոտայում գտնվող վերջինիս բնակարանը կամ վճարել 20.000 ԱՄՆ դոլար: Արդյունքում՝ նախկին կոմերցիոն տնօրենը, Բ.Բեգլարյանի ուղղորդմամբ, իր սեփականություն հանդիսացող բնակարանը 2016 թվականի ապրիլի 25-ին գրավադրել է բանկում, իսկ գրավի 9.700.000 ՀՀ դրամը փոխանցել է ընկերությանը:
Ձեռք բերված ապացույցների հիման վրա՝ «Ֆլեշ» ՍՊԸ-ի նախագահ Բարսեղ Բեգլարյանին մեղադրանք է առաջադրվել՝ ՀՀ քրեական օրենսգրքի 322-րդ հոդվածի 2-րդ մասով:
