Երիտասարդ իրավաբանների և իրավաբան ուսանողների համար նախատեսված դպրոցի հերթական դասընթացը մեկնարկեց քաղաքացիների հետ շփման նուրբ հարցերի քննարկումից: Այս մասին տեղեկանում ենք «ԼԻԳԼ ԸԼԱՅԸՆՍ» իրավաբանական ընկերությունից: Մինչ հիմնական թեմաներին անցնելը փաստաբան Մարիամ Զադոյանը և իրավաբան Առնոլդ Վարդանյանը անդրադարձան նախորդ դասընթացի արդյունքներին:
Այսօր առաջին բանախոս՝ փաստաբան Մարատ Ատովմյանը խոսեց քաղաքացիների հետ շփման հմտությունների մասին: Նա երիտասարդ իրավաբաններին ներկայացրեց պրակտիկ մի քանի դրվագ, երբ հոգեկան շեղումներ ունեցող քաղաքացիները վիրավորել են փաստաբանին կամ պաշտոնյային, անգամ ֆիզիկապես սպառնացել: Եղել են դեպքեր, երբ քաղաքացին իրավաբանական խորհրդատվություն ստանալու նպատակով այցելել է համապատասխան գրասենյակ դանակը գրպանում, կամ պետական մարմնից մերժում ստանալով այցելել է համապատասխան պաշտոնյաներին և ապակու կտորը փորի մոտ պահելով սպառնացել է ինքնասպանություն գործել, եթե իր պահանջը չբավարարվի: Նման դեպքերում անհրաժեշտ է պահպանել սառնասրտություն, քաղաքացու պահվածքը չընդունել որպես անձնական վիրավորանք և իր հետ չբռնվել լեզվակռվի կամ ձեռնամարտի: Պետք է հանգիստ բացատրել, որ վիրավորելով, սպառնալով նրանք երբեք չեն հասնի դրական արդյունքի:
Հաջորդ դասավանդողը՝ «ԼԻԳԼ ԸԼԱՅԸՆՍ» իրավաբանական ընկերության փաստաբան Սյուզաննա Սողոմոնյանն էր, ով ներակայացրեց դիմումի կազմման հմտություններն ու առանձնահատկությունները: Նրա խոսքերով պետական և տեղական ինքնակառավարման մարմիններին, հանրային ծառայություններ մատուցող և այլ կազմակերպություններին, ֆիզիկական անձանց հասցեագրված դիմումները պետք է ունենան հետևյալ կառուցվածքը՝ ներածական, նկարագրական, պատճառաբանական և եզրափակիչ մասեր:
Այնուհետև նա մեկ առ մեկ ներկայացրեց այս հատվածները:
Մինչ այս տեղեկացրել ենք, որ իրավաբանական ընկերությունը կազմակերպում է բացառիկ դպրոց երիտասարդ իրավաբանների և իրավաբան ուսանողների համար:
Դպրոցի ինֆորմացիոն գործընկերն է Իրավաբան.net կայքը:
Կարդացեք նաև՝
