Այսօր մի խումբ քաղաքացիական ակտիվիստներ բողոքի ակցիա էին կազմակերպել Նալբանդյան փողոցում գտնվող ոստիկանության կենտրոնական շենքի մոտ:  Նրանք պահանջում էին Կոմիտաս 5-ի և Երևանի քաղաքապետարանի հայտնի դեպքերի հետ կապված   ապօրինություններ թույլ տված ոստիկանների նկատմամբ քրեական հետապնդում իրականացնել։

Ակցիային մասնակցում էր նաև Արգիշտի Կիվիրյանը, ով վերջին շրջանում հաճախ է ոստիկանության կողմից բերման ենթարկվել:

Նրա խոսքերով՝ իշխող ռեժիմը փորձում է օգագործել ոստիկանությանն ակտիվ քաղաքացիներին ճնշելու և հասարակության մեջ վախի մթնոլորտ սերմանելու համար. «Վերջին օրերին քաղաքապետարանի և Կոմիտասի 5 հասցեից  ապօրինաբար ակտիվիստներին  տանում են բաժին և նրանց նկատմամբ  կիրառում բռնի ուժ: Ոստիկանությունն ակտիվիստների նկատմամբ որս է սկսել»,- իր ելույթում ասաց Արգիշտի Կիվիրյանը:

Փոխոստիկանապետ Վալերի Օսիպյանը կոչ արեց Արգիշտի Կիվիրյանին ոստիկանության հասցեին արված արտահայտությունների մեջ լինել կոռեկտ: Նրա այդ կոչը քաղաքացիները դիմավորեցին «Օսիպյան հեռացիր» բղավոցներով:

Ակտիվիստ Ռուզան Գրիգորյանը նշեց, որ ոստիկանությունը չի ապահովում ակցիայի մասնակից քաղաքացիների անվտանգությունը, ինչը թույլ է տալիս կարծել, որ նրանց նկատմամբ կիրառվող բռնի գործողությունները, կողոպուտը կատարվում են ոստիկանության թույլտվությամբ:

Նա նաև կոչ արեց ՀՀ ոստիկանապետ Վլադիմիր Գասպարյանին, որպեսզի վերջինս կարողանա ապահովել ոստիկանների և քաղաքացիների շփումը միայն իրավական հարթության մեջ,  ոստիկանները հղումներ անեն բացառապես օրենքներին և զերծ մնան բարոյախրատական ճառերից, որը նրանց իրավասության սահմաններից դուրս է:

Ոստիկանության մոտ տեղի ունեցող ակցիան ավարտվեց հուշաթերթերի բաժանմամբ, որտեղ նշվում է, թե ինչպես պետք է իրենց պահեն քաղաքացիները ոստիկանների հետ շփումների ժամանակ:

Իրավապաշտպան Արթուր Սաքունցը փոխոստիկանապետ Վալերի Օսիպյանին կոչ արեց, որպեսզի նա ապահովի շտապ հավաքի մասնակիցների խաղաղ երթը մինչև ՀՀ դատախազություն:

Ճանապարհին ակցիայի մասնակիցները  մինչև դատախազություն հասնելը բղավում էին «ոստիկանություն, այ քեզ խայտառակություն»,  «ոստիկանություն, այ  քեզ հանցագործություն»:  Դատախազության մոտ   ակտիվիստները սկսեցին բղավել «դատախազություն,  այ  քեզ խայտառակություն»:

Դատախազության դիմաց ակտիվիստներին կանգնել թույլ չտվեցին: Մինչև նրանց տեղ հասնելը,  ոստիկանությունն արդեն փակել էր դատախազության մուտքը:

Մի քանի քաղաքացիների և ոստիկանության աշխատակիցների միջև բախումներ եղան, ովքեր փորձում էին ճեղքել ոստիկանական պատնեշը:

Ակտիվիստ Զարուհի Հովհաննիսյանը դատախազություն հանձնեց ակտիվիստների կազմած նամակը՝ ոստիկանության վերջին օրերի գործողությունների հետ կապված մի շարք պահանջներով։ Մասնավորապես, նրանք պահանջում են, որպեսզի պատասխանատվության ենթարկվեն  օրինախախտ ոստիակնները:

Դիմումի հանձնումից հետո,  ակտիվիստները երթով շարժվեցին դեպի Երևանի քաղաքապետարան, որտեղ, նրանց խոսքերով, տեղի են ունենում հիմնական ապօրինությունները։

Իրավաբան.net