«Երկիր Ծիրանի» կուսակցության նախագահ Զարուհի Փոստանջյանը և նրա ամուսինը՝ Սուրեն Դրամփյանը, հայցադիմում են ներկայացրել վարչական դատարան` ընդդեմ ոստիկանության, Առողջապահական և աշխատանքի տեսչական մարմնի, առողջապահության և ֆինանսների նախարարությունների։
Իրավաբան․net-ը «Դատալեքս» դատական տեղեկատվական համակարգից տեղեկանում է, որ գործը մակագրվել է դատավոր Ելենա Առաքելյանին, սակայն դատական նիստ դեռ չի նշանակվել։
Դատարանը մերժել է Փոստանջյանի և նրա ամուսնու հայցադիմումի ընդունումը։ Հայցվորները դիմել են վարչական վերաքննիչ դատարան։ Հունվարի 31-ին հրապարակվել է նաև վերաքննիչ դատարանի որոշումը, որը անփոփոխ է թողել առաջին ատյանի վճիռը։
Հիշեցնենք, որ ըստ հայցապահանջի՝ վերոնշյալ մարմինների աշխատակիցները «Զվարթնոց» օդանավակայանում հայցվորներին սպառնացել են հոսպիտալացմամբ և մեկուսացմամբ։ Փոստանջյանը և իր ամուսինը պահանջում են հոսպիտալացման և մեկուսացման փորձ կատարելու գործողությունները ոչ իրավաչափ ճանաչել և հատուցել պատճառված ոչ նյութական՝ բարոյական վնասը, որը կազմում է յուրաքանչյուր հայցվորի համար 1 միլիոն դրամ, այսինքն՝ ընդհանուր 2 միլիոն դրամ։
