Ադրբեջանի նախագահ Իլհամ Ալիևը կնոջ՝ Մեհրիբան Ալիևայի և դստեր՝ Լեյլա Ալիևայի հետ այցելել է Արցախի Շուշի քաղաք։ Այսօր առավոտյան տեղեկություններ տարածվեցին, որ Ալիևների ընտանիքն այսօր է մեկնում Շուշի, արդեն ճանապարհին է, սակայն, ըստ ադրբեջանական լրատվամիջոցների, այցը կայացել է երեկ։ Մասնավորապես, ԱՊԱ գործակալության փոխանցմամբ՝ հունվարի 14-ին Ալիևները Ահմեդբեյլի-Ֆիզուլի-Շուշի ավտոճանապարհի 27-րդ կմ-ում մասնակցել են Ֆիզուլի-Շուշի ավտոճանապարհի, ինչպես նաև Ֆիզուլիի օդանավակայանի հիմնարկեքին, այնուհետև գնացել են Շուշի։ Համացանցում տարածված լուսանկարներից երևում է, որ նրանք եղել են նաև Շուշիի Սուրբ Ղազանչեցոց տաճարում։