Նախաքննությունն իրականացնող մարմինը հուլիսի 23-ին բժշկական փորձաքննություն էր նշանակել՝ Ազգային ժողովի պատգամավոր Մանվել Գրիգորյանի առողջական վիճակի ստուգման համար:
Իրավաբան.net-ի հետ զրույցում Մանվել Գրիգորյանի պաշտպան Արսեն Մկրտչյանն ասաց, որ փորձաքննության արդյունքները դեռ հայտնի չեն։
Մանվել Գրիգորյանը բանտախցում ստանում է բժշկական օգնություն, ինչը պաշտպանի խոսքով բավարար չէ։
«Քրեակատարողական հիմնարկը հնրավորություն չունի Մանվելի Գրիգորյանի առողջական վիճակին համապատասխան օգնություն տրամադրել»,- ասաց պաշտպանը։
Արսեն Մկրտչյանն ասաց, որ Մանվել Գրիգորյանը բանտախցում մի քանի այլ կալանավորների հետ է, իսկ տեսակցություններն ու հեռախոսազանգերը արգելված են, ինչը, պաշտպանի խոսքով, անիմաստ սահմանափակում է․
«Բացառության կարգով Մանվել Գրիգորյանը երկու անգամ տեսակցություն է ունեցել»,- ասաց պաշտպանը, բայց չցանկացավ հայտել․ թե ում հետ։
Պաշտպանը ՀՀ երկրորդ նախագահ Ռոբերտ Քոչարյանի կալանավորման մասին ասաց․
«Ի տարբերություն Ռոբերտ Քոչարյանի՝ Մանվել Գրիգորյանը զուսպ է իր արած հայտարարությունների մեջ»։
Պաշտպանը նշեց նաև, որ դատարանի համար որոշիչ դեր է խաղալու կեղծ հանրային կարծիքը, որը ձևավորվել հասարակության մեջ։
Նշենք նաև, որ օգոստոսի 16-ին լրանում է Մանվել Գրիգորյանի կալանքի տակ գտնվելու 2 ամիսը:
Հիշեցնենք, որ Մանվել Գրիգորյանը կալանավորվել է հունիսի 19-ին:
Ինչպես ավելի վաղ հայտնել էինք, ԱԱԾ-ի կողմից իրականացված օպերատիվ-հետախուզական միջոցառումների արդյունքում տվյալներ են ստացվել այն մասին, որ ՀՀ ԱԺ պատգամավոր, ԵԿՄ նախագահ Մանվել Գրիգորյանը այլ անձանց հետ նախնական համաձայնությամբ ապօրինի կերպով ձեռք է բերել և պահում է զենք և ռազմամթերք:Դեպքի առթիվ ՀՀ ԱԱԾ քննչական վարչությունում հարուցվել է քրեական գործ ` ՀՀ քրեական օրենսգրքի 235-րդ հոդվածի 2-րդ մասի հատկանիշներով: Գործի շրջանակներում խուզարկություններ են իրականացվել Մանվել Գրիգորյանի տանը, ամառանոցում և նրան պատկանող այլ տարածքներում: Հայտնաբերվել է ապօրինի կերպով պահվող մեծ թվով զենք և ռազմամթերք:
ԱԺ պատգամավոր Մանվել Գրիգորյանը բերման է ենթարկվել և ձերբակալվել` ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը:
