Ինչպես Iravaban.net-ը տեղեկանում է Դատալեքսից, ՀՀ Երևան քաղաքի առաջին ատյանի ընդհանուր իրավասության քաղաքացիական դատարանը վերադարձրել է Կանադայի միջազգային ինֆորմատիզացիայի ակադեմիայի տնօրեն Ազատ Վարդանյանի հայցադիմումն ընդդեմ «Յուքոմ» ընկերության:
Ի՞նչ է պահանջել հայցվորը
Կանադայի միջազգային ինֆորմատիզացիայի ակադեմիայի տնօրեն Ա.Վ.-ը 2025թ. հունվարի 31-ին հայցադիմում է ներկայացրել Երևան քաղաքի առաջին ատյանի ընդհանուր իրավասության քաղաքացիական դատարան ընդդեմ «Յուքոմ» ընկերության՝ պահանջելով պարտքը չեղյալ համարել և բարոյական վնասի հատուցում գանձել:
Դատարանի որոշման հիմքերը
Դատավոր Սերինե Խաչատրյանը, ուսումնասիրելով հայցադիմումը և կից ներկայացված փաստաթղթերը, 2025թ. փետրվարի 14-ի որոշմամբ վերադարձրել է հայցադիմումը հետևյալ հիմնական պատճառաբանություններով.
- Հայցի ոչ հստակ ձևակերպում. Հայցվորի ներկայացրած պահանջը՝ «Այդպես կոչված պարտքը համարել չեղյալ», հստակ չէ, չի բավարարում որոշակիության պահանջներին և պարզ չէ պատասխանողի կողմից կատարման ենթակա գործողությունների ծավալը:
- Հայցվորի կարգավիճակի խնդիր. Հայցադիմումում որպես հայցվոր նշվել է «Կանադայի միջազգային ինֆորմատիզացիայի ակադեմիայի տնօրեն Ա.Վ.», մինչդեռ հայցադիմումը պետք է ներկայացվեր կամ ֆիզիկական անձի անունից, կամ իրավաբանական անձի, որի պարագայում տնօրենը հանդես է գալիս որպես ի պաշտոնե ներկայացուցիչ, ոչ թե որպես հայցվոր:
- Պարտադիր տվյալների բացակայություն. Հայցադիմումում չի նշվել հայցվորի անձնագրային տվյալները, հաշվառման հասցեն, իրավաբանական անձի պետական գրանցման համարը, պատասխանողի հաշվառման (գտնվելու) վայրի հասցեն, գործին մասնակցող այլ անձանց տվյալները, այն փաստերը, որոնց վրա հիմնվում են հայցապահանջները, ինչպես նաև դրամական պահանջի դեպքում՝ պահանջվող գումարի չափը և հաշվարկը:
- Լեզվական պահանջների խախտում. Որպես պատասխանող նշվել է «Ucom ընկերություն», մինչդեռ հայցադիմումը ՀՀ քաղաքացիական դատավարության օրենսգրքի 16-րդ հոդվածի պահանջների համաձայն պետք է ամբողջությամբ կազմված լինի հայերեն լեզվով:
- Կից փաստաթղթերի բացակայություն. Հայցադիմումին չեն կցվել ՀՀ քաղաքացիական դատավարության օրենսգրքի 122-րդ հոդվածով սահմանված պարտադիր փաստաթղթերը, այդ թվում՝ հայցվորի անձը հաստատող փաստաթղթի պատճենը, պետական տուրքի վճարումը հավաստող փաստաթուղթը և այլն:
- Պետական տուրքի հետ կապված խնդիրներ. Հայցադիմումին կից չի ներկայացվել ներկայացված հայցապահանջների համար օրենքով սահմանված չափով պետական տուրքը վճարելը հավաստող փաստաթուղթ:
- Կից փաստաթղթերի ցանկի բացակայություն. Հայցադիմումում նշված չէ հայցադիմումին կից ներկայացվող փաստաթղթերի ցանկը:
Գործի հետագա ընթացքը
Դատարանի որոշման համաձայն՝ հայցադիմումը վերադարձնելու մասին որոշումն ստանալու պահից եռօրյա ժամկետում հայցադիմումի թերությունները վերացնելու և այն դատարան կրկին ներկայացնելու դեպքում հայցադիմումը կհամարվի առաջին ատյանի դատարան ներկայացված այն սկզբնական ներկայացնելու օրը:
Iravaban.net-ի տվյալներով՝ Դատալեքս համակարգում ԵԴ2/0922/02/25 քաղաքացիական գործի վերաբերյալ այլ տեղեկություններ չկան: Հայտնի չէ, թե արդյո՞ք հայցվորը եռօրյա ժամկետում թերությունները վերացնելուց հետո կրկին հայցադիմում է ներկայացրել առաջին ատյանի դատարան:
