Սեպտեմբերի 24-ին ԱԺ տնտեսական հարցերի մշտական հանձնաժողովի նիստում առաջին ընթերցմամբ քննարկվել է «Չափումների միասնականության ապահովման մասին» օրենքում փոփոխություններ և լրացումներ կատարելու մասին» օրինագիծը։ Iravaban.net-ը տեղեկանում է ՀՀ Ազգային ժողովից:

Օրենքը կարգավորում է Հայաստանի Հանրապետությունում չափումների միասնականության ապահովման իրավական հիմքերը եւ ուղղված է չափումների ոչ հավաստի արդյունքների բացասական հետեւանքներից սպառողների իրավունքների ու օրինական շահերի պաշտպանությանը, տնտեսության զարգացմանը եւ գիտատեխնիկական առաջընթացին:

Հաշվի առնելով ոլորտի նոր զարգացումները և օրենքի կիրարկման ընթացքում արձանագրված բացերը՝ նախաձեռնության նպատակն է լրացնել ոլորտային բացթողումները, սահմանել նոր իրավակարգավորումներ։

ՀՀ էկոնոմիկայի նախարարի տեղակալ Նարեկ Հովակիմյանը ներկայացրել է հիմնական փոփոխությունները․

• ընդլայնվել է օրենքի կարգավորման առարկան,
• սահմանվել են պահանջներ չափման միավորների, չափանմուշների, ստանդարտ նմուշների, չափման միջոցների և մեթոդների պահպանման ու կիրառման վերաբերյալ,
• վերանայվել և ճշգրտվել են մի շարք սահմանումներ, ներդրվել են նոր տերմիններ,
• հստակեցվել և ընդլայնվել են Չափագիտության ազգային մարմնի լիազորությունները՝ ներառելով, օրինակ, թանկարժեք մետաղների սարքավորումների փորձաքննություն և չափագիտական խորհրդի ստեղծում,
• ընդլայնվել են տեսչական մարմնի լիազորությունները՝ ներառելով փաստաթղթերի ստուգման և տեխնիկական վերահսկողության գործառույթներ։

Զեկուցողի խոսքով՝ փոփոխությունները կնպաստեն․

• պետական վերահսկողության արդյունավետության բարձրացմանը,
• տնտեսության և հասարակության համար կարևոր ոլորտներում չափումների արդյունքների նկատմամբ վստահելիության ապահովմանը,
• օրենսդրական կրկնությունների նվազեցմանը։

Հանձնաժողովի անդամները ողջունել են Կառավարության առաջարկած փոփոխությունները՝ ընդգծելով տնտեսավարողների իրավունքների պաշտպանության կարևորությունը։

Նախագիծը ստացել է հանձնաժողովի դրական եզրակացությունը։