Վարչապետ Նիկոլ Փաշինյանն այցելել է Սյունիքի մարզ, ծանոթացել իրականացված և ներկայումս ընթացքի մեջ գտնվող ծրագրերին:
Վարչապետի առաջին կանգառը եղել է Որոտան-Խոտ ավտոճանապարհը, որտեղ ծանոթացել է 10.3 կմ ընդհանուր երկարությամբ ավտոճանապարհի վերակառուցման աշխատանքներին: Ծրագրի ընդհանուր արժեքն ավելի քան 4 մլրդ 198 մլն դրամ է: Զեկուցվել է, որ ճանապարհի 8,7 կմ հատվածում առաջացել է բնական սողանք, որը դարձել է աշխատանքների վերջնաժամկետների ձգձգման պատճառ։ Նիկոլ Փաշինյանը եղել է այդ հատվածում, ծանոթացել տեղի ունեցած փլվածքի հետևանքով առաջացած խնդիրներին և առաջարկվող լուծումներին: Նշվել է նաև, որ Խոտից դեպի Որոտան (Մ-2) հատվածի առաջին 7.2 կմ հատվածում արդեն իսկ տեղադրված է երկշերտ ասֆալտբետոնե ծածկ, իսկ փլուզված հատվածի շրջանցող տեղամասի հողային աշխատանքներն ավարտված են:
Հաջորդիվ Նիկոլ Փաշինյանն այցելել է Կապան` նոր հիմնված հանգստի գոտի: Սուբվենցիոն ծրագրի ընդհանուր արժեքը կազմել է ավելի քան 89 մլն դրամ, որից ավելի քան 49 մլն դրամը հատկացրել է Կառավարությունը:
Երկրի ղեկավարին ներկայացվել են Կապան քաղաքի թունելից մինչև Բաղաբերդ թաղամասի միջնամասը` 7,4 կմ հատվածում, փողոցային լուսավորության համակարգի կառուցման աշխատանքները: Սուբվենցիոն ծրագրի ընդհանուր արժեքն ավելի քան 149 մլն դրամ է, պետության մասնաբաժինը կազմել է 70%՝ 104 մլն դրամ։ Արդյունքում՝ Կապանում տեղադրվել են երկկողմանի 249 լուսատուներով մետաղական հենասյուներ:
Նիկոլ Փաշինյանն այցելել է Կապանի հիմնանորոգված թիվ 1 մանկապարտեզ: Սուբվենցիոն ծրագրի ընդհանուր արժեքը կազմել է ավելի քան 377 մլն դրամ, որի է 80% -ը՝ ավելի քան 302 մլն դրամը, հատկացրել է Կառավարությունը։ Մանկապարտեզը նախատեսված է 170 երեխայի համար:
Վարչապետը Կապանում մասնակցել է նաև Շրջակա միջավայրի նախարարության Էկոպարեկային ծառայության Սյունիքի մարզային վարչության գործունեության մեկնարկի արարողությանը:
Նիկոլ Փաշինյանը հանդես է եկել ելույթով, դիմել միջոցառմանը ներկա օրենսդիր, գործադիր, իշխանության, տեղական ինքնակառավարման մարմինների ներկայացուցիչներին, Էկոպարեկային ծառայության աշխատակիցներին, կապանցիներին, շնորհավորել նրանց Էկոպարեկային ծառայության նորամուտի առիթով և նշել. «Մենք արդեն մի քանի տարի քննարկում ենք այս փոփոխությունը, այս նոր ինստիտուտի ներդրումը, և ահա, այն առաջինն իրականություն է դառնում Սյունիքի մարզում: Կարծում եմ՝ սա շատ կարևոր իրադարձություն է: Ուզում եմ ընդգծել՝ այն փոփոխությունները, բարեփոխումները, որ անում ենք, առաջին հերթին վերաբերմունքի փոփոխության մասին են»: Նիկոլ Փաշինյանի խոսքով, դա վերաբերմունքի փոփոխություն է մեր շրջակա միջավայրի, պետության և պետական ինստիտուտների նկատմամբ:
Վարչապետն ընդգծել է, որ ենթակառուցվածք ստեղծելուն զուգահեռ, չափազանց կարևոր է նաև պատասխանատվության զգացումը. «Եվ ես ուզում եմ համոզվել, որ Էկոպարեկային ծառայության յուրաքանչյուր աշխատակից, ունենալով նոր կառույց, ունենալով նոր աշխատանքային գործիք, ունենալով նոր ավտոմեքենա, պետք է ունենա նաև նոր պատասխանատվություն, որպեսզի պահպանի Հայաստանի Հանրապետության անտառը Հայաստանի քաղաքացիների համար։ Այս ծառայությունը նրա մասին չէ, որ մենք ուրիշներին չթողնենք, որ անտառը կտրի, որպեսզի մենք ավելի հաջողված կտրենք։ Այս ծառայությունը նրա մասին է, որ ծառի, անտառի, բնության, կենդանու, շրջակա միջավայրի նկատմամբ պետք է փոխվի մեր վերաբերմունքը և պետք է փոխվի մեր պատասխանատվությունը, և ուրիշ տարբերակ չկա»։
Նիկոլ Փաշինյանը նաև հավելել է. «Իհարկե, ես չեմ ասում, որ այսպիսի մի արարողությամբ ամեն ինչ մի վայրկյանում միանգամից փոխվելու է: Ոչ, որովհետև իներցիան հաճախ շատ անհաղթահարելի ուժ է, բայց մենք պետք է լինենք հետևողական, սկզբունքային, մենք պետք է մեր սխալներից դասեր քաղենք և պետք է պատասխանատվություն ունենանք մեր քաղաքացիների և մեր սերունդների նկատմամբ»:
Երկրի ղեկավարը տեղեկացրել է նաև, որ առաջիկայում բոլոր մարզերում կստեղծվեն Էկոպարեկային ծառայություններ, որոնք կիրականացնեն անտառների պահպանության 24 ժամյա ծառայություն: Ամփոփելով իր խոսքը՝ Նիկոլ Փաշինյանը հաջողություն է մաղթել ծառայության աշխատակիցներին այդ կարևոր գործում:
Միջոցառումն ավարտվել է Էկոպարեկային ծառայության գործառնական ավտոմեքենաների ցուցադրությամբ, որոնք հագեցած տեխնիկական անհրաժեշտ միջոցներով: Պետական բյուջեի միջոցներով ձեռք են բերվել, մասնավորապես՝ 22 հատ Իսուզու դե մաքս մակնիշի ամենագնաց մեքենաներ 331,8 մլն դրամ արժողությամբ: Ընդհանուր առմամբ Էկոպարեկային ծառայության ստեղծման համար պետական բյուջեի միջոցներից հատկացվել է 660 մլն 484 հազար դրամ, իսկ միջազգային գործընկերների աջակցությունը կազմել է ավելի քան 64 մլն դրամ:
Երկրի ղեկավարին ներկայացրել են նաև Շրջակա միջավայրի նախարարության Էկոպարեկային ծառայության Սյունիքի մարզային վարչության գործունեության Կապանի տեղամասի վերանորոգման աշխատանքները: Կապան, Գորիս քաղաքներում և Շվանիձոր բնակավայրում իրականացվել են ծառայության Սյունիքի մարզային վարչության 3 տեղամասերի վերանորոգման, զենքի պահասենյակների և անհրաժեշտ այլ գրասենյակային գույքով և տեխնիկայով կահավորման աշխատանքներ, որի համար հատկացել է 70 419 800 դրամ:
