Սահմանադրական դատարանը մարտի 25-ին և 26-ին աշխատակարգային 3 որոշումներ է ընդունել, որոնք վերաբերում են «Ապօրինի ծագում ունեցող գույքի բռնագանձման մասին» օրենքի՝ Սահմանադրությանը համապատասխանության հարցը որոշելու գործի քննությանը։
Հիշեցնենք՝ Սահմանադրական դատարանն աշխատակարգային որոշմամբ գործի վարույթը կասեցրել էր 2023թ. հուլիսի 7-ին։
Iravaban.net-ի փոխանցմամբ՝ մարտի 25-ի որոշումներից մեկով նշվում է, որ Սահմանադրական դատարանի դատավոր Հրայր Թովմասյանի մասնակցությունը գործի քննությանն անհնարին է, քանի որ վերջինս կանխակալ վերաբերմունք ունի որպես կողմ հանդես եկող անձի նկատմամբ, ինչպես նաև նա գիտի կամ ողջամտորեն պետք է իմանա, որ ինքն անձամբ և իր մերձավոր ազգականը տնտեսական շահ ունեն` կապված վեճի էության հետ:
Նշենք, որ դատախազությունը ապօրինի ծագում ունեցող գույքի բռնագանձման հայց է ներկայացրել նաև ընդդեմ Հրայր Թովմասյանի և նրա կնոջ։
Մեկ այլ որոշմամբ էլ ՍԴ-ն Դատական դեպարտամենտին է վերադարձնել այնտեղից ստացված նյութերը, քանի որ դրանք գործով հնարավոր որևէ ելքի համար նշանակություն չունեն։ Բացի այդ, դրանցում հիշատակված անձանց մասնավոր և ընտանեկան կյանքի, պատվի ու բարի համբավի անձեռնմխելիության, անձնական տվյալների պաշտպանության՝ առանց իրավաչափ նպատակի անհամաչափ միջամտությունը բացառելու նկատառումով նշված նյութերը չեն ճանաչվել գործի նյութեր:
Սահմանադրական դատարանը նաև որոշել է վերսկսել գործի վարույթը, գործով դատաքննությունը նշանակել ապրիլի 4-ին, 11։00-ին։
«Սահմանադրական դատարանն ստացել է վերոհիշյալ գործով պահանջված ապացույցները և դրանց վերլուծության և ուսումնասիրության արդյունքում արձանագրում է, որ «Հայաստանի Հանրապետության Ազգային ժողովի պատգամավորների ընդհանուր թվի առնվազն մեկ հինգերորդի դիմումի հիման վրա՝ «Ապօրինի ծագում ունեցող գույքի բռնագանձման մասին» օրենքի՝ Սահմանադրությանը համապատասխանության հարցը որոշելու վերաբերյալ» գործի վարույթը կասեցնելու՝ 2023 թվականի հուլիսի 7-ի ՍԴԱՈ-84 աշխատակարգային որոշմամբ սահմանված հիմքերը վերացել են»,-նշվում է որոշման մեջ:
