Վերջերս երկու քաղաքացի բանավիճում էին այն հարցի շուրջ, թե արդյո՞ք բժիշկն իրավունք ունի չվիրահատել անհետաձգելի վիրահատության կարիք ունեցող անձին, եթե նախապես չի կատարվում վիրահատության համար սահմանված վճարումը:
Բժշկական օգնություն և սպասարկում իրականացնողները պարտավոր են յուրաքանչյուր մարդու ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի և այլ հանգամանքների առկայությունից.
ՀՀ Օրենսդրությունը չի սահմանում, թե ո՞ր բժշկական օգնությունն է համարվում անհետաձգելի, հետևաբար անհետաձգելի բառը պետք է մեկնաբանել տառացի նշանակությամբ: Սակայն օրենսդրությունը սահմանում է բժշկական օգնության հասկացությունը, որը իր մեջ ներառում է ինչպես առաջնային բժշկական օգնությունը, այնպես էլ մասնագիտացված բժշկական օգնությունը, այսնինքն՝ բժշկական օգնությունը որպես ախտորոշման և բժշկական առանձնահատուկ մեթոդների ու բարդ բժշկական տեխնոլոգիաների վրա հիմնված բժշկական օգնության և սպասարկման տեսակ:
ՀՀ Քրեական օրենսգիրքը պատասխանատվություն է սահմանում հիվանդին առանց հարգելի պատճառի օգնություն ցույց չտալու համար այն անձի կողմից, ով պարտավոր էր դա ցույց տալ, եթե հիվանդի առողջությանն անզգուշությամբ պատճառվել է ծանր կամ միջին ծանրության վնաս:
Բացի այդ, քրեորեն պատժելի է նաև բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը՝ դրանց նկատմամբ անփույթ կամ անբարեխիղճ վերաբերմունքի հետևանքով, եթե բուժվող հիվանդի առողջությանն անզգուշությամբ պատճառվել է ծանր կամ միջին ծանրության վնաս կամ անզգուշությամբ առաջացրել է բուժվող հիվանդի մահ կամ մարդու իմունային անբավարարության վարակի հարուցիչով վարակում:
Իսկ բժշկական օգնություն և սպասարկում սպասարկում իրականացնող է հանդիսանում Հայաստանի Հանրապետության օրենսդրությամբ սահմանված կարգով լիցենզավորված, բնակչությանը բժշկական օգնության և սպասարկման որոշակի տեսակներ ցուցաբերող ֆիզիկական և իրավաբանական անձը, անհատ ձեռներեցը կամ իրավաբանական անձի կարգավիճակ չունեցող ձեռնարկությունը` անկախ կազմակերպական-իրավական տեսակից և սեփականության ձևից:
