Ադրբեջանի մի խումբ քաղաքացիներ շարունակում են փակ պահել Արցախն աշխարհին կապող կյանքի միակ ճանապարհը՝ բնապահպանական պատճառաբանություններով։
Նրանք ադրբեջանական լրատվամիջոցներին հայտնել են, որ ակցիան շարունակվելու է այս գիշեր։
«Բնապահպանները» պահանջել են, որ բոլոր կետերում, որտեղ տեղակայված են ռուս խաղաղապահները, ծառայությունը անցկացնեն Ադրբեջանի համապատասխան պետական կառույցների հետ՝ «բնական ռեսուրսների ապօրինի տեղափոխմանն ու շահագործմանը վերջ տալու համար»։
Նրանք վանկարկել են տարբեր կարգախոսներ՝ «Վերջ տվեք բնապահպանական հանցագործություններին», «Դադարեցրե՛ք էկոահաբեկչությունը», «Պաշտպանե՛ք բնությունը», «Ո՛չ էկոցիդի, այո մոնիթորինգին»:
Հիշեցնենք, որ դեկտեմբերի 12-ին ժամը 10։30-ի սահմաններում, ադրբեջանական կողմը՝ խախտելով 2020 թվականի նոյեմբերի 9-ի եռակողմ համաձայնագրի դրույթները, փակել է Լաչինի միջանցքը: Նրանք վրաններ են տեղադրել, վառարաններ բերել։
Հարյուրավոր քաղաքացիներ, այդ թվում` անչափահասներ, չեն կարողանում տուն վերադառնալ, նրանց մի մասը ժամանակավոր մնացել է Սյունիքի մարզում։
Ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի տրանսպորտային կապը մայրաքաղաք Ստեփանակերտի հետ։
