Մինչև դատավճռի հրապարակումը հայազգի վարորդ Հրաչյա Հարությունյանին Հայաստան տեղափոխել հնարավոր չէ:  Այս մասին Իրավաբան.net-ի թղթակցի հետ զրույցում ասաց  Հայաստանի երիտասարդ իրավաբանների ասոցիացիայի (ՀԵԻԱ) «Մարդու իրավունքների հանձնաժողովի» նախագահ, փաստաբան Մարատ Ատովմյանը:

Վերջինիս խոսքերով՝  քրեական գործ է հարուցվել Ռուսաստանի Դաշնության կողմից, քանի որ Հարությունյանը  կասկածվում է այդ պետության տարածքում հանցագործություն կատարելու մեջ:

ՌԴ քրեական օրենսգրքի 11-րդ հոդվածի 1-ին մասի համաձայն ՌԴ տարածքում հանցագործություն կատարած անձը ենթակա է քրեական պատասխանատվության ՌԴ քրեական օրենսգրքին համապատասխան:

«Յուրաքանչյուր քրեական գործի քննության ժամանակ կատարվում են մի շարք դատավարական գործողություններ: Կոնկրետ այս գործի շրջանակներում պետք է հարցաքննվեն բազմաթիվ տուժողներ, վկաներ, նշանակվեն փորձաքննություններ և այլն: Բնականաբար, հնարավոր չէ Ռուսաստանում կատարված դեպքը քննել Հայաստանում»,- նշեց Մարատ Ատովմյանը:

Փաստաբանի փոխանցմամբ՝  նմանատիպ օրենք գործում է նաև Հայաստանում: ՀՀ քրեական օրենսգրքի 14-րդ հոդվածի 1-ին մասը սահմանում է, որ եթե ՀՀ տարածքում հանցանք կատարած անձը ենթակա է պատասխանատվության ՀՀ  քրեական օրենսգրքով:

Մարատ Ատովմյանը տեղեկացրեց, որ Հրաչյա Հարությունյանին Հայաստան տեղափոխելու հարցին հնարավոր կլինի անդրադառնալ միայն այն դեպքում, երբ Ռուսաստանում օրինական ուժի մեջ կմտնի վերջինիս ազատազրկման դատապարտող դատավճիռ: Նա կոչ արեց  չմոռանալ անմեղության կանխավարկածի մասին  և չբացառել, որ հայ վարորդը կարող է ընդհանրապես չդատապարտվել ազատազրկման:

«Եթե, այնուամենայնիվ, նա Ռուսատանում դատարանի կողմից դատապարտվի ազատազրկման, ապա այս դեպքում Հայաստանի Հանրապետությունը կարող է դիմել Ռուսաստանին, որպեսզի Հրաչյա Հարությունյանը պատիժը կրի հայրենիքում»,- զրույցի վերջում հավելեց Մարատ Ատովմյանը:   

Արև Ավագյան

Իրավաբան.net