Բրիտանական Waitrose սուպերմարկետների ցանցը սահմանափակել է ձեթի վաճառքը՝ Ուկրաինայում իրավիճակի հետ կապված դեֆիցիտի պատճառով: Այս մասին գրում է Daily Mail-ը, փոխանցում է «ՌԻԱ Նովոստին»:
Waitrose խանութներում հայտնվել են ցուցանակներ, որոնք սահմանափակում են բոլոր տեսակի բուսական յուղերի վաճառքը՝ յուրաքանչյուր հաճախորդին երկու շիշով:
«Մենք ցանկանում ենք այնպես անել, որ մեր բոլոր հաճախորդները կարողանան գնել բուսական յուղ, ուստի խնդրում ենք, որ նրանցից յուրաքանչյուրը գնի ոչ ավելի քան երկու շիշ», – ասել է սուպերմարկետների ցանցի ներկայացուցիչը:
Մեկ այլ խոշոր սուպերմարկետների ցանց՝ Sainsbury’s-ը, իր խանութներում փակցրել է ցուցանակներ՝ նախազգուշացնելով գնորդներին, որ որոշ ապրանքատեսակների մեջ արևածաղկի ձեթը կարող է փոխարինվել ռապսի ձեթով:
Նշենք, որ Մեծ Բրիտանիայի բուսական յուղի խոշորագույն արտադրողը՝ Edible Oils-ը, անցյալ շաբաթ նախազգուշացրել էր, որ Մեծ Բրիտանիային մնացել է ընդամենը մի քանի շաբաթվա արևածաղկի ձեթ՝ սպառման համար:
Բացի այդ, Walkers չիպսեր արտադրող PepsiCo ընկերությունը տեղեկացրել էր, որ իր չիպսերի մեջ ժամանակավորապես կօգտագործվի կանոլայի յուղ՝ արևածաղկի ձեթի փոխարեն:
