ԱՄՆ-ը հինգշաբթի օրը կներկայացնի Ռուսաստանի դեմ պատժամիջոցների նոր փաթեթ, որը կազդի ինչպես անհատների, այնպես էլ տարբեր կառույցների վրա, հայտարարել է ԱՄՆ նախագահի ազգային անվտանգության հարցերով խորհրդական Ջեյք Սալիվանը։
«Մենք՝ Միացյալ Նահանգները, վաղը կհայտարարենք պատժամիջոցների փաթեթի մասին, որը վերաբերում է և՛ քաղաքական գործիչներին, և՛ օլիգարխներին, և՛ սուբյեկտներին: Այն կհրապարակվի վաղը», – ասել է նա լրագրողներին:
Սալիվանն ուղեկցում է ԱՄՆ նախագահ Ջո Բայդենին Եվրոպա կատարած այցի ժամանակ՝ ԵՄ ղեկավարության և G7-ի գործընկերների հետ քննարկելու Ուկրաինայի զարգացումները։
Հաղորդվում է, որ Վլադիմիր Զելենսկին ԱՄՆ նախագահ Ջո Բայդենին խորհուրդ է տվել ժամանակավորապես սահմանափակող միջոցներ չկիրառել ռուս գործարար Ռոման Աբրամովիչի նկատմամբ, քանի որ նա կարող է օգնել Ռուսաստանի հետ բանակցություններում, գրում է Wall Street Journal-ը՝ հղում անելով աղբյուրներին։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
