Ռուսաստանը դադարեցնում է պատերազմը, որը Կիևի ռեժիմը ութ տարի վարում էր Դոնբասի բնակչության դեմ, հայտարարել է ՌԴ ԱԳ նախարար Սերգեյ Լավրովը, փոխանցում է «ՌԻԱ Նովոստին»։
Ավելի վաղ Իրանի արտգործնախարար Հոսեյն Ամիր Աբդոլլահիանը հայտնել էր, որ Ուկրաինայի արտգործնախարար Դմիտրի Կուլեբան իրեն խնդրել է Լավրովին ուղերձ փոխանցել Ուկրաինայի շուրջ քաղաքական կարգավորման անհրաժեշտության մասին։
«Իրանի արտաքին գործերի նախարարը փոխանցեց պարոն Կուլեբայի ցանկությունը, որ անհրաժեշտ է շուտափույթ դադարեցնել պատերազմը: Ես կարող եմ ձեզ վստահեցնել, որ մենք հենց դա ենք անում: Մենք դադարեցնում ենք պատերազմը, որն ունի Կիևի ռեժիմը՝ Դոնբասի բնակչության դեմ, որը մղվել է առնվազն ութ տարի։ Այս պատերազմը պետք է դադարեցվի հատկապես հիմա»,- ասել է Լավրովը։
Նրա խոսքով, այս բոլոր փաստերի մասին լռում են Արևմուտքում, որտեղ «նրանք շարունակում են հիստերիա հրահրել՝ բացահայտ կեղծիքներ տարածելով»:
Նախարարը հավելել է, որ Ռուսաստանը Իրանին է փոխանցել նյութեր՝ տեղեկություններով, թե ինչ է իրենից ներկայացնում Ուկրաինայի կառավարությունը։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
