Ուկրաինան հասկանում է, որ ինքը ՆԱՏՕ-ի անդամ չէ, հետևաբար նրան անհրաժեշտ են հուսալի անվտանգության երաշխիքներ և հույս ունի համագործակցության գործընկերների հետ, ովքեր պատրաստ են օգնել Ռուսաստանի Դաշնության ռազմական ագրեսիային հակազդելու հարցում։ Այս մասին Ուկրաինայի նախագահ Վլադիմիր Զելենսկին ասել է Միացյալ էքսպեդիցիոն ուժերի ղեկավարների հանդիպմանը, փոխանցում է Ukrinform-ի թղթակիցը։

«Հասկանալի է, որ Ուկրաինան ՆԱՏՕ-ի անդամ չէ: Մենք դա հասկանում ենք: Տարիներ շարունակ մենք լսել ենք իբր բաց դռների մասին, բայց արդեն իմացել ենք, որ չենք կարող մտնել այնտեղ: Դա ճիշտ է: Սա պետք է ընդունել: Ես ուրախ եմ, որ մեր ժողովուրդը սկսում է հասկանալ և հույս դնել մեզ վրա, ինչպես նաև մեզ օգնող գործընկերների վրա: Ուկրաինան ներկայումս չի հավակնում ակտիվացնել ՆԱՏՕ-ի պայմանագրի 5-րդ հոդվածը… Մենք հասկանում ենք, որ մենք Դաշինքում չենք: Պաշտպանեք երկինքը: Կցանկանայի, որ բոլորը դա լսեին»,- ընդգծել է ուկրաինական պետության ղեկավարը:

Նրա խոսքով՝ Ուկրաինան ամեն ինչ անում է ինքնաթիռներ ու հակաօդային պաշտպանություն ստանալու համար։ Զելենսկին հայտարարել է, որ Ռուսաստանի ներխուժումը Ուկրաինայի տարածք ոչնչացրել է բացարձակապես այն ամենը, ինչը աջակցում է թե՛ ուկրաինական տարածաշրջանի անվտանգությանը, թե՛ միջազգային անվտանգությանը։ Զելենսկին նշել է, որ անվտանգության ամենահզոր դաշինքը՝ ՆԱՏՕ-ն, կասկածի տակ է դրել իր վստահելիությունը։

Ուկրաինայի նախագահը կարծիք է հայտնել, որ դաշինքի որոշ անդամներ «ուղղակի հիպնոսացված են» Ռուսաստանի Դաշնության ագրեսիայից և անհանգստացած են Երրորդ համաշխարհային պատերազմի հավանական մեկնարկով, եթե նրանք փակեն Ուկրաինայի երկինքը։

Նա նաև ասել է, որ Ուկրաինայի իշխանությունները միջազգային գործընկերներին իրենց երկինքն ու ժողովրդին ինքնուրույն պաշտպանելու միջոց են առաջարկել։