ԱՄՆ-ն Չինաստանին փոխանցել է, որ թույլ չի տա Ռուսաստանին փոխհատուցել պատժամիջոցների պատճառով կրած կորուստները։ Այս մասին կիրակի օրը CNN-ի եթերում հայտարարել է ԱՄՆ նախագահի ազգային անվտանգության հարցերով խորհրդական Ջեյք Սալիվանը։
«Մենք Պեկինին փոխանցել ենք, որ չենք հանդուրժի, որ որևէ երկիր փոխհատուցի Ռուսաստանին պատժամիջոցների պատճառով կրած կորուստները»,- ասել է նա։
Միաժամանակ Սալիվանը միանշանակ չի պատասխանել՝ արդյոք դա նշանակում է Պեկինի նկատմամբ պատժամիջոցներ կիրառելու հնարավորություն։
«Ես հրապարակայնորեն սպառնալիքներ չեմ հնչեցնի, բայց կասեմ, որ մենք ուղղակիորեն ոչ հրապարակային ուղիներով ասում ենք Չինաստանին, որ, անկասկած, կլինեն հետևանքներ, եթե փորձեն օգնել Ռուսաստանին խուսափել պատժամիջոցներից կամ փոխհատուցել դրանք», – նշել է նա։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
