Չեռնիգովի շրջանում ուկրաինացի զինվորականները ջախջախել են ռուսների ուժերին՝ կասեցնելով նրա առաջխաղացումը դեպի Կիև։ Հակառակորդի տեխնիկան այրվել է, իսկ ռուսական ուժերը դիմել են փախուստի։ Այս մասին հայտնում է Укринформ-ը:
«Չեռնիգովի մարզում «Հյուսիս» օպերատիվ հրամանատարության ստորաբաժանումներն այսօր ջախջախել են հակառակորդի ուժերին և հերթական անգամ կանխել նրանց առաջխաղացումը դեպի Ուկրաինայի մայրաքաղաք: Ռուս թշնամու զինվորները չունեն սնունդ, վառելիք, նրանք բարոյալքված են և պատրաստ են հանձնվել: Բայց ուկրաինացի պաշտպանները վստահորեն պահում են պաշտպանության գիծը, պատրաստ են պաշտպանել տարածաշրջանը, պետությունը և նրա ժողովրդին մինչև վերջ», – ասվում է գերատեսչության տարածած հաղորդագրության մեջ:
Նրանք նշել են, որ ռուսական տեխնիկան այրվել և շարքից դուրս է եկել, իսկ ռուսական ուժերը դիմել են փախուստի։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։
«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:
Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 5:00-ից (Երևանի ժամանակով 7:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։
Գերագույն Ռադան Ուկրաինայում ռազմական դրություն է մտցրել։
