Ուկրաինայի նախագաh Վլադիմիր Զելենսկին նոր ուղերձ է հղել՝ նշելով․
«Մենք դիմակայել և հաջողությամբ հետ ենք մղել թշնամու գրոհները։ Կռիվը շարունակվում է․ մեր պետության շատ քաղաքներում և շրջաններում։ Բայց մենք գիտենք, թե ինչ ենք պաշտպանում՝ երկիրը, հողը, երեխաների ապագան։ Կիևը և մայրաքաղաքի շրջակայքի առանցքային քաղաքները վերահսկվում են մեր բանակի կողմից։ Օկուպանտներն ուզում էին փակել մեր պետության կենտրոնը և իրենց խամաճիկներին դնել այստեղ, ինչպես Դոնեցկում։ Մենք խախտեցինք նրանց ծրագիրը»,-նշել է Զելենսկին։
__________
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։
«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:
Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 05:00-ից (Երևանի ժամանակով 07:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։
Գերագույն Ռադան Ուկրաինայում ռազմական դրություն է մտցրել։ Ուկրաինայի ՆԳՆ-ն զոհերի և վիրավորների նախնական թիվ է հայտնում։
