Հայաստանի վարչապետ Նիկոլ Փաշինյանը մարտին կայցելի Թուրքիա, հայտարարել է Թուրքիայի փոխնախագահ Ֆուաթ Օքթայը, փոխանցում է «ՏԱՍՍ»-ը։
«Փաշինյանը մարտին կայցելի Թուրքիա և կմասնակցի Անթալիայում կայանալիք դիվանագիտական ֆորումին»,- Օքթայի խոսքերն է մեջբերում Ahaber հեռուստաալիքը։
Հիշեցնենք, որ հունվարի 24-ին, առցանց ասուլիսի ժամանակ Փաշինյանը հայտարարել էր․ «Հավանականությունը մեծ է, որ Հայաստանը կընդունի Անթալիայի դիվանագիտական ֆորումին մասնակցելու հրավերը։
Ամեն ինչ կախված է այդ պահին առկա իրավիճակից, բայց առաջին հանդիպումից հետո մեծանում է հավանականությունը, որ ՀՀ-ն կընդունի այդ հրավերը։ Խոսակցություն է սկսվել և անտրամաբանական կլինի, եթե մենք խոսելու այդ առիթը և հնարավորությունը բաց թողնենք։ Առավել ևս, որ մենք ավելի լայն համատեքստում քննարկումներ իրականացնելու հնարավորություն կունենանք»,-նշել էր նա։
