Աֆղանստանում «Թալիբան» շարժման ձեռքին են հայտնվել Միացյալ Նահանգների զինված ուժերի թողած ռազմական սարքավորումները և սպառազինությունը՝ ընդհանուր մոտ 85 մլրդ դոլար արժողությամբ:
Այս մասին թվիթերի իր միկրոբլոգում գրել է ԱՄՆ նախկին նախագահի որդին՝ Դոնալդ Թրամփ Կրտսերը:
Նրա խոսքով՝ հաշվի առնելով, որ Միացյալ Նահանգների բնակչությունը 320 մլն է, ապա ստացվում է, որ երկրի յուրաքանչյուր բնակիչ «Թալիբանի» նպատակների համար հանգանակել է մոտ 265 դոլար:
Ըստ վերջին տեղեկությունների՝ «Թալիբան» շարժումը մերժել է Ֆրանսիայի նախագահ Էմանուել Մակրոնի՝ Աֆղանստանի մայրաքաղաք Քաբուլում մարդասիրական գործողությունների համար «անվտանգ գոտի» ստեղծելու առաջարկը, հայտնում է DW-ն:
«Դրա անհրաժեշտությունը չկա: Աֆղանստանն անկախ երկիր է: Ցանկացած աֆղանստանցի օգոստոսի 31-ից հետո ցանկության դեպքում կկարողանա մեկնել արտերկիր: Ինչպես մյուս պետություններում, դրա համար կպահանջվեն համապատասխան փաստաթղթեր, մասնավորապես՝ անձնագիր և վիզա»:
Թալիբները հերքել են նաև այն պնդումները, թե ստեղծել են իրենց հակառակորդների սև ցուցակ, որում ներառված են այն քաղաքացիները, որոնք աշխատել են օտարերկրյա ուժերի կամ Քաբուլի վարչակազմի հետ:
