«Մենք պետք է կենտրոնանանք իրականության վրա: Իրականությունն այն է, որ անկախություն ձեռք բերելուց ի վեր առաջին անգամ կա բացառիկ հնարավորություն Ադրբեջանի և Հայաստանի միջև հարաբերությունների կարգավորման համար: Ինչո՞ւ եմ ասում՝ առաջին անգամ, քանի որ այլևս օկուպացիայի փաստ չկա»,-այս մասին TRT World-ին տված հարցազրույցում ասել է Ադրբեջանի արտգործնախարար Ջեյհուն Բայրամովը:
Նա հիշեց, որ ՄԱԿ-ի չորս բանաձևերի համաձայն, Ադրբեջանը վերականգնել է իր տարածքային ամբողջականությունը:
«Շուրջ 30 տարվա թշնամանք, օկուպացիա, կորուստներ և պատերազմի հետևանքներ կան: Բայց մենք հավատում ենք, որ պետք է նայել ապագային: Գիտեք, դա մեզ համար հեշտ չէ, քանի որ հիշողությունը վերակենդանացնում է տեղի ունեցածը: Սակայն Ադրբեջանի նախագահը շեշտեց հարաբերությունների կարգավորման անհրաժեշտությունը:
Ադրբեջանը պատրաստ է աշխատել Հայաստանի հետ խաղաղության պայմանագիր կնքելու համար: Մենք առաջարկում ենք սա: Մենք Հայաստանից ակնկալում ենք քաղաքական կամք և իրական քայլեր», – ասաց նա:
Հիշեցնենք, որ 2020 թվականի սեպտեմբերի 27-ին ադրբեջանական կողմը մարտական գործողություններ է սկսել Լեռնային Ղարաբաղում և օկուպացրել է դրա մեծ մասը, այդ թվում՝ Շուշի քաղաքը։
Նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին սեպտեմբերի 27-ից սկսած ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Բացի այդ, շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։ Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։
