Կիրակի օրը Ադրբեջանի նախագահ Իլհամ Ալիևը Ռուսաստանի փոխվարչապետ, տնտեսական համագործակցության միջկառավարական հանձնաժողովի համանախագահ Ալեքսեյ Օվերչուկի հետ քննարկել է առաջիկա տարում երկու երկրների փոխգործակցության հարցեր: Այդ մասին հաղորդում է «Ազերթագ» պետական լրատվական գործակալությունը:
«Հանդիպմանը քննարկվել են Ադրբեջանի և Ռուսաստանի միջև համագործակցության ուղղությունները տնտեսական, էներգետիկայի, տրանսպորտի, գյուղատնտեսության ոլորտներում և վստահություն է հայտնվել կապերի հետագա ընդլայնման հարցում», – նշվում է հայտարարության մեջ:
Ռուսաստանի Դաշնության փոխվարչապետը Բաքու կատարած այցի ընթացքում ադրբեջանական պետության ղեկավարին ողջույններ է փոխանցել ՌԴ նախագահ Վլադիմիր Պուտինից:
Ալիևն ու Օվերչուկը նշել են Ադրբեջանի և Ռուսաստանի միջև ռազմավարական գործընկերության վրա հիմնված բարեկամական հարաբերությունների հաջող զարգացումը:
«Ընդգծվեց, որ չնայած կորոնավիրուսային համաճարակին 2020 թվականին, տնտեսական ոլորտում կապերը զարգացել են», – ասվում է հաղորդագրության մեջ:
Հիշեցնենք, որ վարչապետ Նիկոլ Փաշինյանն էլ է այսօր ընդունել փոխվարչապետ Ալեքսեյ Օվերչուկին:
ՀՀ վարչապետը և ՌԴ փոխվարչապետն անդրադարձել են Հայաստանի և Ռուսաստանի միջև տարբեր բնագավառներում, այդ թվում` տնտեսական, էներգետիկ, տրանսպորտային ենթակառուցվածքների զարգացման, կորոնավիրուսի դեմ պայքարի ուղղությամբ փոխգործակցությանը:
