Երևանի ընդհանուր իրավասության դատարանում դատախազության նախաձեռնությամբ այսօր՝ հունվարի 15-ին, արտահերթ նիստ է հրավիրվել ԱԺ նախկին պատգամավոր Մանվել Գրիգորյանի խափանման միջոցի քննարկման վերաբերյալ։
Դատական նիստը նախագահում է դատավոր Մնացական Մարտիրոսյանը։
Փորձաքննությանը մասնակցած և այսօր դատարան ներկայացած բժիշկ-փորձագետ Գագիկ Հարությունյան խոսքով, Մանվել Գրիգոյանի առողջական վիճակի ոչ ցանկալի բարդացում է գրանցվել, որը անկանխատեսելի հետևանքների կարող է հանգեցնել, նա նաև սրտի անբավարարվաություն ունի՝ բարձր աստիճանի, Գրիգորյանի նախորդիվ նշված մի շարք հիվանդություններ բարդացել են։ «Զարկերակային ճնշման թվերը կյանքին վտանգ սպառնացող են»,-նշեց նա։
Դատախազը միջնորդեց վերանայել ընտրված խափանման միջոցը:
Դատարանն անցավ խորհրդակցական սենյակ՝ դատախազության կողմից ներկայացված միջնորդության վերաբերյալ որոշում կայացնելու:
Այն կհրապարակվի այսօր՝ 20:30-ին:
Նշենք, որ Մանվել Գրիգորյանը երեկ տեղափոխվել է վերակենդանացման բաժանմունք։
Հիշեցնենք, որ Մանվել Գրիգորյանը մեղադրվում է ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
