Երևան քաղաքի ընդհանուր իրավասության դատարանի Կենտրոնի նստավայրում, դատավոր Մնացական Մարտիրոսյանի նախագահությամբ սկսվել է ԱԺ նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի գործով դատական նիստը:
Դատարանը նշեց, որ դատարան տեղափոխելուց առաջ առողջական խնդիրներ են եղել։ Մնացական Մարտիրոսյանը հայտնեց նաև, որ պաշտպանական կողմը միջնորդություն է ներկայացրել դատարան խափանման միջոց կալանքը գրավով փոխարինելու մասին։
Այս կապակցությամբ դատարանը դիմել է բժշկական կենտրոն և քրեակատարողական հիմնարկ՝ որոշակի տեղեկություն ստանալու համար շաքարային դիաբետ ունեցողնրի սննդակարգի, պահման պայմանների մասին։
ԲԿ-ից հայտնում են, որ սննդակարգը հիվանդի համար ապահովվում է, սակայն պալատի ներսում հսկողություն են իրականացնում իրավապահ մարմինները։ ՔԿԾ-ից էլ հայտնել են, որ Մանվել Գրիգորյանը ամեն օր է հրաժարվել ճաշացանկից և օգտվել է իրեն հասցեագրված հանձնուքներից։
«Եթե նա չհրաժարվեր իրեն հատկացված սննդից, ապա ՔԿՀ-ն կապահովեր նրան «Դիաբետիկ սեղան N9» սննդից»,-նշեց դատավորը։
Պաշտպանները ցանկություն հայտնեցին առանց Մանվել Գրիգորյանի ներկայության ներկայացնել իրենց միջնորդությունը։ Նիստը շարունակվում է։
Հիշեցնենք, որ Մանվել Գրիգորյանը մեղադրվում է ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
