Երևան քաղաքի ընդհանուր իրավասության դատարանի Կենտրոնի նստավայրում, դատավոր Մնացական Մարտիրոսյանի նախագահությամբ ընթանում է ԱԺ նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի գործով դատական նիստը:
Դատական նիստին ԱԺ նախկին պատգամավորը կրկին ներկա չէր: Դատավոր Մնացական Մարտիրոսյանը հայտնեց, որ ստացել է համապատասխան գրություն Մանվել Գրիգորյանի առողջական վիճակի վերաբերյալ:
Մանվել Գրիգորյանի պաշտպան Լևոն Բաղդասարյանը դատարանում յոթ անուն անշարժ գույք ներկայացրեց, խնդրելով դրանք ազատել կալանքից: Նեկայացված յոթ գույքից հինգը Մանվել Գրիգորյանի անունով է, երկուսը՝ կազմակերպության:
Նախագահող դատավոր Մնացական Մարտիրոսյանը նշեց, որ անհարժեշտ է վկայականների, պայմանագրերի առկայություն, որպեսզի գումարները փոխանցվեն դատարանի դեպոզիտ հաշվին: Դատավորը նշեց, որ դրանից հետո կանցնեն պաշտպանների միջնորդության քննարկմանը:
Մանվել Գրիգորյանի պաշտպանն առարկեց՝ նշելով, որ դատարանը խախտում է անմեղության կանխավարկածը՝ ասելով, որ հնարավոր է Մանվել Գրիգորյանի պատկանող գույքը բարեխիղճ չի ձեռքբերվել:
Այս դատական նիստին ևս Մանվել Գրիգորյանի պաշտպանները միջնորդություն ներկայացրեցին Մանվել Գրիգորյանի խափանման միջոց կալանքը փոխելու և որպես այլընտրանքային միջոց՝ գրավ կիրառելու վերաբերյալ: Որպես գրավի չափ առաջարկվեց սահմանել մինչև 5 միլիոն դրամ գումար:
Դատարանը անցավ խորհրդակցության սենյակ: Որոշումը կհրապարակի ժամը 14:00-ին:
Հիշեցնենք, որ Մանվել Գրիգորյանը մեղադրվում է ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
