Քիչ առաջ վերաքննիչ քրեական դատարանը հրապարակեց ԱԺ նախկին պատգամավոր Մանվել Գրիգորյանի դեմ խափանման միջոցի վերաբերյալ որոշումը. Իրավաբան.net-ի թղթակիցը հայտնում է, որ մեղադրող դատախազ Վահագն Մուրադյանը քիչ առաջ հայտնել է, որ Մանվել Գրիգորյանը կրկնին կկալանավորվի:
Հիշեցնենք, որ նա դեկտեմբերի 21-ին 25 միլիոն դրամի գրավի դիմաց ազատ է արձակվել կալանավայրից՝ առաջին ատյանի դատարանի որոշմամբ:
Այս պահին վերաքննիչ ատյանի մոտ հավաքված են մի խումբ քաղաքացիներ և պահանջում են Մանվել Գրիգորյանին կալանավորել:
Նշենք, որ ԱԱԾ-ի կողմից իրականացված օպերատիվ-հետախուզական միջոցառումների արդյունքում տվյալներ են ստացվել այն մասին, որ ՀՀ ԱԺ պատգամավոր, ԵԿՄ նախագահ Մանվել Գրիգորյանը այլ անձանց հետ նախնական համաձայնությամբ ապօրինի կերպով ձեռք է բերել և պահում է զենք և ռազմամթերք:Դեպքի առթիվ ՀՀ ԱԱԾ քննչական վարչությունում հարուցվել է քրեական գործ ` ՀՀ քրեական օրենսգրքի 235-րդ հոդվածի 2-րդ մասի հատկանիշներով: Գործի շրջանակներում խուզարկություններ են իրականացվել Մանվել Գրիգորյանի տանը, ամառանոցում և նրան պատկանող այլ տարածքներում: Հայտնաբերվել է ապօրինի կերպով պահվող մեծ թվով զենք և ռազմամթերք:
ԱԺ պատգամավոր Մանվել Գրիգորյանը բերման է ենթարկվել և ձերբակալվել` ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը:
